- अवैध रूपमा भित्रिने भारतीय फूल रोक्न सुरक्षा निकायलाई निर्देशन ।
- प्लास्टिकका कृत्रिम फूल बिक्री र भण्डारण गरे कारबाही हुने ।
- स्थानीय सयपत्री र मखमली फूल प्रयोग गर्न प्रशासनको आग्रह ।
झापा । स्वदेशी फूल उत्पादनलाई प्रोत्साहन गर्ने उद्देश्यले जिल्ला प्रशासन कार्यालय झापाले अवैध रूपमा आयातित फूल र प्लास्टिकबाट निर्मित कृत्रिम फूल नियन्त्रण गर्न सुरक्षा निकायलाई निर्देशन दिएको छ ।
प्रमुख जिल्ला अधिकारी श्रवणकुमार पोखरेलले सार्वजनिक सूचना जारी गर्दै स्वदेशी सिर्जनशीलता र उद्यमशीलतालाई प्रोत्साहित गर्न गैरकानुनी रूपमा फूल आयात गर्न रोक लगाइएको बताउनुभयो ।
खुला सीमाको फाइदा उठाउँदै तिहार, छठलगायतका पर्वमा ठूलो मात्रामा खपत हुने फूल भारतबाट अवैध रूपमा आयात हुँदै आएको थियो । प्रशासनको निर्देशनपछि फूलको अवैध आयात रोकिने विश्वास गरिएको छ ।
झापामा व्यावसायिक फूल खेती गर्दै आएका किसानले आयातित फूलका कारण स्वदेशी उत्पादन खेर गइरहेको भन्दै गैरकानुनी आयातमा पूर्ण प्रतिबन्ध लगाउन जिल्ला प्रशासन कार्यालयसँग सामूहिक माग गर्दै आएका थिए ।
“हाम्रो जिल्लालाई पुग्ने फूल यहीँका व्यवसायीले उत्पादन गरिसक्नुभएको छ,” प्रजिअ पोखरेलले भन्नुभयो, “जिल्लाका युवामा उद्यमशील सोच र संस्कृति मौलाउँदै गएकाले यसपालिको चाडबाडमा स्वदेशी सयपत्री र मखमली फूलकै प्रयोग गरी हाम्रै किसानलाई प्रोत्साहन गर्न सम्पूर्ण जिल्लावासीलाई हार्दिक आग्रह गर्दछु ।”
यस वर्ष झापाका मेचीनगर, बिर्तामोड, दमक, शिवसताक्षी, कनकाई, बुद्धशान्तिलगायतका पालिकामा दर्जनौँ किसानले व्यावसायिक रूपमा सयपत्री फूलको खेती गरेका छन् । चाडबाडका समयमा घरआँगन सजावट र शृङ्गारका लागि स्थानीय रूपमा उत्पादित प्राकृतिक फूल नै पर्याप्त हुने अनुमान गरिएको छ ।
प्रशासनको उक्त कदमले सीमावर्ती क्षेत्रबाट हुने अवैध आयात रोकिने र जिल्लाका स्थानीय फूल उत्पादक किसानले आफ्नो मेहनतको उचित मूल्य पाउने मेचीनगर-४ का नीलकण्ठ तिवारीले बताउनुभयो ।
प्रचलित कानुनले निषेध गरेका प्लास्टिकका फूल बिक्री-वितरण वा भण्डारण गरेको पाइएमा कानुनबमोजिम कारबाही गरिने पनि प्रशासनले स्पष्ट पारेको छ । रासस
