- बाढीपहिरो प्रभावितको तत्काल उद्धार र राहतमा जोड ।
- क्षतिग्रस्त सडक तथा राजमार्ग शीघ्र सञ्चालन गर्न माग ।
- राहतसँगै महँगी र कृत्रिम अभाव नियन्त्रण गर्न आग्रह ।
काठमाडौँ । सांसदहरूले लगातारको वर्षाका कारण विभिन्न जिल्लामा भएको बाढीपहिरोको क्षति तथा प्रभावितलाई तत्काल उद्धार, राहत र पुनःस्थापनाको व्यवस्था गर्न सरकारको ध्यानाकर्षण गराउनुभएको छ ।
राष्ट्रियसभाको आजको बैठकको आकस्मिक समयमा बोल्दै सांसदहरूले चार दिनसम्म परेको अविरल वर्षाका कारण देशका विभिन्न स्थानमा बाढीपहिरोबाट भएको जनधन तथा भौतिक संरचनाको क्षतिबारे सभाध्यक्षमार्फत सरकारको ध्यानाकर्षण गराउनुभएको हो ।
नेपाली कम्युनिष्ट पार्टीका सांसद राजेन्द्रलक्ष्मी गैरेले पाल्पामा बाढीपहिरोका कारण सडक अवरुद्ध हुनुका साथै मानवीय तथा भौतिक क्षति भएको बताउनुभयो । उहाँले बाढीपहिरोमा परी ज्यान गुमाउनेप्रति श्रद्धाञ्जली व्यक्त गर्दै प्रभावित परिवारप्रति दुःख व्यक्त गर्नुभयो ।
सडक, पुल तथा भवनमा पुगेको क्षतिबारे सरकारको ध्यानाकर्षण गराउँदै उहाँले उद्धारमा खटिएका सबैप्रति आभार व्यक्त गर्नुभयो ।
नेकपा (एमाले)का सांसद सम्झना देवकोटाले चार दिनको अविरल वर्षाका कारण गण्डकी प्रदेशको मनाङमा भएको बाढीपहिरो तथा मुख्य राजमार्गमा पुगेको क्षति तत्काल मर्मत गरी सञ्चालनमा ल्याउन माग गर्नुभयो ।
उहाँले स्थानीय बजार तथा बस्तीमा परेको प्रभावप्रति चिन्ता व्यक्त गर्दै नजिकिँदै गरेको चाडपर्वका बेला सडक अवरुद्ध हुँदा आवतजावत तथा दैनिक उपभोग्य वस्तुको आपूर्तिमा समस्या र महँगी बढ्न नदिन आवश्यक सहयोग समयमै जुटाउन सरकारसँग माग गर्नुभयो ।
जनता समाजवादी पार्टी नेपालका सांसद पूजा चौधरीले बाढीपहिरो प्रभावित क्षेत्रमा उद्धार तथा राहत कार्यलाई तीव्रता दिन माग गर्नुभयो । उहाँले विपद्का कारण महामारीको जोखिम बढ्न सक्ने भन्दै त्यसतर्फ पनि सरकारको ध्यानाकर्षण गराउनुभयो ।
रसुवाका बाढी प्रभावितलाई समयमै राहत उपलब्ध गराउनुका साथै पुनःस्थापनाको काम अघि बढाउन माग गर्दै उहाँले बजारमा हुन सक्ने महँगी र कृत्रिम अभाव नियन्त्रण गर्नसमेत सरकारसँग आग्रह गर्नुभयो । रासस
