- नेपालले बहराइनलाई सात विकेटले हराउँदै सुखद सुरुआत गर्यो ।
- सन्दीप लामिछानेले पाँच विकेट लिएपछि बहराइन ८७ रनमै समेटियो ।
- नेपालका अर्जुन कुमाल ३६ रनमा अविजित रहे ।
रे समाचार/काठमाडौँ । एसिसी प्रिमियर कप क्रिकेट प्रतियोगितामा नेपालले बहराइनलाई सात विकेटले पराजित गर्दै सुखद सुरुआत गरेको छ ।
मलेसियाको बांगीमा आज भएको खेलमा बहराइनले दिएको ८८ रनको सामान्य लक्ष्य नेपालले २१ ओभरमा तीन विकेट गुमाएर पूरा गरेको हो ।
नेपालका लागि अर्जुन कुमालले अविजित ३६ रन बनाए । उनले ५८ बलमा पाँच चौका प्रहार गरे । रोहितकुमार पौडेलले अविजित १९, आसिफ शेखले १८ र देव खनालले १० रन जोडे ।
बलिङतर्फ बहराइनका इमरान जाभेद अनवारले तीन विकेट लिए ।
त्यसअघि टस हारेर पहिले ब्याटिङ गरेको बहराइन ३६.२ ओभरमा सबै विकेट गुमाएर ८७ रनमा समेटिएको थियो ।
बहराइनका लागि फिआज अहमेदले १५ बलमा सर्वाधिक १५ रन बनाए । मुहम्मद वासिमले १३ रन जोडे । अन्य खेलाडीले दोहोरो अङ्कमा रन बनाउन सकेनन् ।
बहराइनलाई ८७ रनमा समेट्ने क्रममा नेपालका सन्दीप लामिछानेले पाँच विकेट लिए । ललितनारायण राजवंशीले तीन तथा करण केसीले दुई विकेट लिए ।
नेपालले प्रतियोगिताको दोस्रो खेल भदौ १८ गते मलेसियासँग खेल्नेछ ।
-1787810412.png)
