काठमाडौँ । अष्ट्रेलियामा आयोजना हुने ‘टप एन्ड टी–२० सिरिज’मा सहभागिता जनाउने नेपाल ‘ए’ क्रिकेट टोलीको बिदाइ गरिएको छ । नेपाल क्रिकेट सङ्घ (क्यान)ले आज यहाँ आयोजित कार्यक्रमबीच टोलीको बिदाइ गरेको हो ।
टोलीलाई क्यानका उपाध्यक्ष रोशनकुमार सिंह, सदस्य वीरेन्द्रबहादुर चन्दलगायतले बिदाइ गर्नुभयो । उपाध्यक्ष सिंहले टोलीलाई शुभकामना दिँदै उत्कृष्ट नतिजाको आशा राखेको बताए ।
“नेपाली टोलीले जित्दा सबैले प्रशंसा पाउँछौँ । हार्दा बढी प्रश्न खेलाडीभन्दा क्यानमाथि तेस्र्याइन्छ । यसपालि हाम्रा खेलाडीले उत्कृष्ट खेल्नेमा आशावादी छौँ”, उपाध्यक्ष सिंहले भने ।
टप एन्ड टी-२० सिरिजमा नेपाल ‘ए’ को कप्तानी अनिलकुमार साहले गर्नेछन् । टोलीमा कुशल भुर्तेल, लोकेश बम, मयन यादव, तृतराज दास, कुशल मल्ल, राशिद खान, पवन सर्राफ, दीपक डुम्रे, शाहब आलम, विपिन खत्री, रिजन ढकाल, नारायण जोशी, आकाश चन्द र युवराज खत्री पनि रहेका छन् ।
प्रतियोगिता अस्ट्रेलियाको नर्थन टेरिटोरीमा हुनेछ । अगस्ट २१ तारिखदेखि सुरु हुने उक्त सिरिजमा नेपालले लिग चरणमा ६ खेलमा प्रतिस्पर्धा गर्नेछ । प्रतियोगिताको पहिलो खेलमा नेपालले २१ अगस्टमा एनटी स्ट्राइकको सामना गर्नेछ । नेपालले दोस्रो पटक टप एन्ड टी–२० सिरिज खेल्न लागेको हो । रासस
