• डा. केसी र सरकारी वार्ता टोलीबीच शिष्टाचार भेट ।
• औपचारिक वार्ता भोलिदेखि सुरु हुने ।
• डा. केसी तीन दिनदेखि आमरण अनशनमा ।

रे समाचार/काठमाडौं । आमरण अनशनमा रहेका डा. गोविन्द केसी र सरकारी वार्ता टोलीबीच शनिबार शिष्टाचार भेट भएको छ । दुवै पक्षबीच आइतबारदेखि औपचारिक वार्ता सुरु गर्ने सहमति भएको छ ।

डा. केसीका सहयोगी डा. अमृत जैसीका अनुसार शिक्षा सचिव तथा सरकारी वार्ता टोलीका सदस्य चूडामणि पौडेल अस्पताल पुगेर डा. केसीको स्वास्थ्य अवस्थाबारे जानकारी लिनुभएको थियो । उहाँले सरकारका तर्फबाट सद्भाव पनि व्यक्त गर्नुभएको थियो ।

सरकारी वार्ता टोलीका अन्य सदस्य काठमाडौं बाहिर वा व्यस्त रहेकाले शनिबार औपचारिक वार्ता हुन नसकेको जनाइएको छ । टोलीका सबै सदस्य उपस्थित भएपछि आइतबारदेखि औपचारिक वार्ता सुरु गर्ने सहमति भएको डा. जैसीले जानकारी दिनुभयो ।

चिकित्सा शिक्षा र स्वास्थ्य क्षेत्र सुधारका विभिन्न माग राख्दै डा. केसी तीन दिनदेखि आमरण अनशनमा हुनुहुन्छ । भोलिदेखि हुने वार्ताबाट उहाँका माग सम्बोधन गर्दै अनशन अन्त्य गराउने सकारात्मक निष्कर्ष निस्कने अपेक्षा गरिएको छ।