रे समाचार/काठमाडौं । एसीसी महिला यू-१९ प्रिमियर कपको सेमिफाइनलमा नेपाल सुपर ओभरमा यूएईसँग पराजित हुँदै प्रतियोगिताबाट बाहिरिएको छ । निकै रोमाञ्चक बनेको खेलमा निर्धारित २० ओभरसम्म दुवै टोलीले समान १००-१०० रन बनाएपछि विजेताको टुंगो सुपर ओभरबाट लगाइएको थियो ।

यूएईले दिएको १०१ रनको लक्ष्य पछ्याएको नेपालले अन्तिमसम्म संघर्ष गरे पनि २० ओभरमा अलआउट हुँदै ठीक १०० रन मात्रै बनाउन सक्यो । त्यससँगै खेल बराबरीमा टुंगिएपछि सुपर ओभरको सहारा लिनुपरेको थियो ।

सुपर ओभरमा पहिले ब्याटिङ गरेको नेपालले ६ विकेट गुमाउँदै ७ रनको लक्ष्य प्रस्तुत गर्‍यो । जवाफमा यूएईले आक्रामक सुरुआत गर्दै केवल तीन बलमै लक्ष्य पूरा गर्यो र फाइनलमा स्थान सुरक्षित गर्‍यो ।

प्रतिस्पर्धाभर उत्कृष्ट प्रदर्शन गर्दै सेमिफाइनलसम्म पुगेको नेपालको यात्रा भने यस हारसँगै समाप्त भएको छ । नेपालले खेलभर केही महत्वपूर्ण साझेदारी गरे पनि निर्णायक क्षणमा त्यसलाई जितमा रूपान्तरण गर्न सकेन ।

यस जितसँगै यूएई एसीसी महिला यू-१९ प्रिमियर कपको फाइनलमा पुगेको छ। अब यूएईले उपाधिका लागि थाइल्यान्डसँग प्रतिस्पर्धा गर्नेछ ।

उता, नेपालको युवा टोलीले प्रतियोगितामा देखाएको प्रदर्शनले भविष्यप्रति आशा जगाएको छ । सेमिफाइनलसम्मको यात्रा र प्रतिस्पर्धात्मक खेलले नेपाली महिला क्रिकेटको सम्भावना थप उजागर गरेको छ, यद्यपि उपाधि जित्ने लक्ष्य भने यसपटक अधुरै रह्यो ।