काठमाण्डू । चीनका राष्ट्राध्यक्ष सी चिनफिङ र अमेरिकी राष्ट्रपति डोनाल्ड ट्रम्पले ३० तारिख बिहान दक्षिण कोरियाको बुसानमा वार्ता गर्नुभएको छ।

राष्ट्राध्यक्ष सीका अनुसार, चीन र अमेरिकाको राष्ट्रिय अवस्था फरक भएकाले केही मतभिन्नता हुनु सामान्य हो। विश्वका दुई ठूला अर्थतन्त्र भएको नाताले कहिलेकाहीँ बाझाबाझ हुनु पनि सामान्य कुरा हो। चुनौती र संकटको सामना गर्दा, मैले र राष्ट्रपति ट्रम्पले कप्तानको रूपमा दिशा निर्देशन गर्नुपर्छ, ठुलो मूल स्थिति नियन्त्रण गर्नुपर्छ र चीन–अमेरिका सम्बन्धको यो ठूलो जहाजलाई स्थिर रूपमा अगाडि बढाउन प्रत्याभूति दिनुपर्छ, उहाँले भन्नुभयो। राष्ट्रपति ट्रम्पसँग मिलेर चीन-अमेरिका सम्बन्धलाई सबल आधारको सिर्जना गर्ने र दुवै देशमा घरेलु विकासका लागि राम्रो वातावरण सिर्जना गर्ने इच्छा राखेको पनि उहाँले बताउनुभएको छ। 

चिनियाँ अर्थतन्त्रको विकास प्रवृति राम्रो छ। चिनियाँ अर्थतन्त्र एक विशाल समुद्र जस्तै छ, यसको आकार, लचकता र सम्भावना ठूलो छ, चीनसँग विभिन्न जोखिम र चुनौतीको सामना गर्ने विश्वास र क्षमता छ। चीन कम्युनिष्ट पार्टीको २०औँ राष्ट्रिय सम्मेलनको चौथो पूर्ण बैठकले आगामी ५ वर्षमा अर्थतन्त्र र समाजको विकास योजनाको सुझाव पारित गरेको छ। चीनले सुधारलाई गहिरो बनाउनुका साथै खुलापनलाई विस्तार गरी अर्थतन्त्रको गुणस्तरको प्रभावकारी वृद्धि र मात्राको उचित वृद्धि पारेर, मानवको समग्र विकास र सम्पूर्ण जनताको साझा समृद्धि प्रवर्द्धन गर्नेछ। यसले चीन-अमेरिका सहयोगका लागि पनि अझ व्यापक अवसर खोल्ने विश्वास उहाँले गर्नुभएको छ।

दुई देशका आर्थिक र व्यापार टोलीले महत्वपूर्ण आर्थिक र व्यापार समस्याबारे गहिरो वैचारिक आदानप्रदान गरेर समस्याको समाधानमा सहमति बनाएका छन्। अर्थतन्त्र र व्यापार चीन-अमेरिका सम्बन्धको स्थायी स्तम्भ र प्रोत्साहक बन्नुपर्छ, बाधक वा द्वन्द्वको कारण होइन। दुवै टोलीले समान, सम्मान र पारस्परिक फाइदाको सिद्धान्तमा आधारित भएर वार्ता गरेर समस्या सूची निरन्तर घटाउँदै र सहकार्य सूची विस्तार पार्नुपर्छ। 

विरोध भन्दा संवाद राम्रो हो भन्ने कुरामा राष्ट्राध्यक्ष सीले जोड दिनुभएको छ।

राष्ट्रपति ट्रम्पले राष्ट्राध्यक्ष सीसँग भेट गर्न पाएकोमा खुशी लागेको बताउनुभयो। राष्ट्राध्यक्ष सी सम्मानीय महान नेता र मित्र भएको उल्लेख गर्नुहुँदै सम्बन्ध धेरै खुशीलाग्दो रहेको बताउनुभयो। अमेरिका-चीन सम्बन्ध सधैँ राम्रो रहेको र भविष्यमा अझ राम्रो हुने तथा चीन र अमेरिकाको भविष्य अझै सुन्दर हुने आशा पनिस व्यक्त गर्नुभयो। चीन अमेरिकाको सबैभन्दा ठूलो साझेदार हो। दुबै देशले हातेमालो गर्दा विश्वमा धेरै ठूला काम गर्न सक्छन्। भविष्यमा अमेरिका-चीनको सहयोगले अझ ठूलो उपलब्धि हासिल गर्नेछ। 

दुई राष्ट्रनायकले अर्थतन्त्र तथा व्यापार, ऊर्जा लगायत क्षेत्ररूमा दुवै पक्षबीचको सहकार्य बढाउने र सांस्कृतिक आदानप्रदान प्रवर्द्धन गर्न सहमति गर्नुभएको छ।