• नेपाल र जापानबीच अपराह्न ४ बजे प्रतिस्पर्धा हुँदै ।
• जापानविरुद्ध उत्कृष्ट प्रदर्शन गर्ने नेपालको लक्ष्य ।
• नेपाल समूह ‘ए’ मा, इन्डोनेसियासँग पनि खेल्ने ।

काठमाडौँ । बीसौँ संस्करणको एसियाली खेलकुदमा नेपाली राष्ट्रिय महिला भलिबल टोलीले आज आयोजक जापानविरुद्ध प्रतिस्पर्धा गर्दैछ ।

नेपाल र जापानबीचको खेल अपराह्न ४ बजेदेखि कोमाकीस्थित पार्क एरिनामा सुरु हुनेछ ।

प्रतियोगितामा नेपाल समूह ‘ए’ मा रहेको छ । नेपालले समूह चरणमा इन्डोनेसियाविरुद्ध पनि खेल्नेछ ।

भलिबलमा जापान तुलनात्मकरूपमा नेपालभन्दा बलियो टोली हो । एफआईभीबीको ताजा विश्व वरियतामा जापान छैटौँ र नेपाल ६९औँ स्थानमा छन् ।

नेपालले आजको खेलमा जापानविरुद्ध उत्कृष्ट प्रदर्शन गर्ने लक्ष्य राखेको छ ।

एसियाली खेलकुदमा नेपाली महिला भलिबल टोलीले लगातार दोस्रोपटक सहभागिता जनाउन लागेको हो ।

सन् २०२३ मा चीनको हाङ्झाउमा भएको १९औँ एसियाली खेलकुदमा नेपालले ११औँ स्थान हासिल गरेको थियो । रासस