काठमाण्डू । चीनको सिचुआन विश्वविद्यालयको नेपाल अध्ययन केन्द्रका निर्देशक प्रा हुआङ झेङ डुओले राष्ट्रिय समाचार समिति (रासस) सँग सहकार्य गरी नेपाल–चीनबीचको सम्बन्धलाई जनस्तरमा पु¥याउन इच्छुक रहेको बताउनुभएको छ ।    
    
 नेपाल भ्रमणमा रहनुभएका निर्देशक डुओले आज रासस केन्द्रीय कार्यालयको भ्रमणका क्रममा दुई देशबीचको सम्बन्धलाई अझ कसिलो बनाउन मिडियाले महत्वपूर्ण भूमिका खेल्नसक्ने बताउँदै राससजस्तो आधिकारिक संस्थासँगको सहकार्य सिचुआन विश्वविद्यालयका लागि पनि अवसर हुनसक्दछ भन्नुभयो ।    
    
 सो अवसरमा राससका महाप्रबन्धक सन्दीप राईले नेपाल–चीनबीचको ऐतिहासिक सम्बन्धको चर्चा गर्दै यस परम्परागत सम्बन्धलाई जनस्तरमा विस्तार गर्न राससले विशेष महत्व दिएको बताउनुभयो । उहाँले निकट भविष्यमै राससले चीनमा पनि आफ्नो प्रतिनिधि राख्न लागेको जानकारी दिनुभयो ।    
    
 राससका आलेख शाखाप्रमुख कृष्ण अधिकारीले दुई देशबीचको सम्बन्ध विस्तारमा राससले पु¥याउँदै आएको योगदानका बारेमा जानकारी गराउनुभयो । सिचुआन विश्वविद्यालयमा विद्यावारिधि गरिरहनुभएका प्रशान्तकुमार विकेले नेपालको विकासमा चीनले उच्च महत्व दिएको उल्लेख गर्नुभयो ।     
    
 सो अवसरमा निर्देशक डुओलाई राससद्वारा प्रकाशित रासस फोटो किताब २०८२ प्रदान गरिएको थियो । पुस्तकबाट नेपालको संस्कृति र पूर्वाधारका क्षेत्रमा आफूले धेरै जानकारी पाएको निर्देशक डुओले बताउनुभयो । रासस