नकाबभित्रका ती मान्छे.......
गजल
नकाब भित्रका ती मान्छे.......
- श्रीभक्त पौडेल “आफन्त“
नकाब भित्रका ती मान्छे, चिन्नु परेको छ
यहाँ ‘आगो’ बेचेर पानी, किन्नु परेको छ !!
यहाँ ‘पानी’ बेचेर आगो, किन्नु परेको छ ।।
भनेको जस्तो जुत्ता, नहुँदा यो दुनियाँमा
कसम दुबै खुट्टा लुकाई, हिँड्नु परेको छ !!
जिन्दगी बन्यो चुनाव टिकट पाउनै मुस्किल
हार्नेलाई नै पटक-पटक, जित्नु परेको छ !!
बनेर गुमनाम आफै, आफ्नै बदनाम गरेर
आखिर दुश्मनका ढोल, पिट्नु परेको छ !!
बुझ्नुस् न ! रेटिनुभन्दा अर्कैका हातबाट
छुरी बोकेर आफ्नै गला, गिंड्नु परेको छ
यहाँ आगो बेचेर पानी किन्नु परेको छ …..
भरतपुर-१६ रामपुर चितवन
प्रकाशित मिति: बिहीबार, वैशाख २७, २०८१ १४:०७
प्रतिक्रिया दिनुहोस्
