- साउदी अरेबियालाई पाँच विकेटले हराउँदै नेपाल सेमिफाइनलमा ।
- नेपालका लागि गुल्शन झा अविजित ४४ र रोहित पौडेल अविजित २४ रन ।
- समूह चरणको अन्तिम खेल मंगलबार हङकङसँग, समूह विजेताको टुङ्गो लाग्ने ।
रे समाचार/काठमाडौं । एसीसी प्रिमियर कप क्रिकेटमा नेपाल लगातार तेस्रो जित निकाल्दै एक खेल अगावै सेमिफाइनलमा प्रवेश गरेको छ । नेपालले आज साउदी अरेबियालाई पाँच विकेटले पराजित गर्दै अन्तिम चारमा स्थान पक्का गरेको हो ।
साउदी अरेबियाले दिएको १९१ रनको लक्ष्य नेपालले ४१ ओभरमा पाँच विकेट गुमाएर पूरा गर्यो । नेपालका लागि गुल्शन झाले अविजित ४४ तथा कप्तान रोहित पौडेलले अविजित २४ रन बनाउनुभयो ।
त्यसअघि इशान पान्डेले ४०, देव खनालले ३९, आसिफ शेखले २० र अर्जुन कुमालले १५ रन बनाउनुभयो । साउदीका लागि इस्तियाख अहमद र मुहम्मद आतिफले दुई-दुई तथा मोहम्मद हिशमले एक विकेट लिनुभयो ।
टस जितेर पहिले ब्याटिङ गरेको साउदी अरेबियाले ४९.२ ओभरमा सबै विकेट गुमाएर १९० रन बनाएको थियो । उसका लागि अब्दुल वाहीदले सर्वाधिक ७७, मोहम्मद आतिफले ३० र मोहम्मद हिशम शेखले १८ रन बनाउनुभयो ।
नेपालका लागि कप्तान सन्दीप लामिछानेले १० ओभरमा १९ रन खर्चेर तीन विकेट लिनुभयो । ललित राजवंशीले दुई तथा दीपेन्द्रसिंह ऐरीले तीन र शेर मल्लले एक विकेट लिनुभयो ।
यसअघि नेपालले बहराइन र मलेसियालाई पराजित गरेको थियो । नेपालले समूह चरणको अन्तिम खेल मंगलबार हङकङसँग खेल्नेछ । उक्त खेलपछि समूह विजेताको टुङ्गो लाग्नेछ ।
