रमेश हतुवाली/काठमाण्डू । ललितपुरमा आज एकै साथ दुईवटा कृति लोकापर्ण गरिएको छ ।
नेपाल स्रष्टा समाजको आयोजनामा आज बिहान कुपण्डोलमा भव्य समारोहबीच नेत्र प्रसाद फुयलद्वारा लिखित कृति “किशनसिंह धामी” र तारा-किसन फाउण्डेशनद्वारा प्रकाशित तथा श्रीओम श्रेष्ठ रोदनद्वारा सम्पादित कृति “दार्चुलाः कला-साहित्य” लोकापर्ण गरिएको हो ।
अग्रज साहित्यकार तथा पत्रकार प्रमोद प्रधान, प्राध्यापक डाक्टर भरत भट्टराई, प्राध्यापक डाक्टर तारा निरौला, प्राध्यापक डाक्टर खगेन्द्र प्रसाद लुईटेल, साहित्यकार पवन आलोक, प्राध्यापक डाक्टर लक्ष्मी प्रसाद गौतम र साहित्यकार ज्ञानु अधिकारी लगायतका महानुभावहरुले ती कर्तिहरुको लोकापर्ण गर्नुभएको हो ।
कृति लोकापर्ण समारोहमा बोल्नुहुँदै अग्रज साहित्यकार तथा पत्रकार प्रमोद प्रधानले “दार्चुलाः कला-साहित्य” नामक कृतिको प्रकाशनले कुनै पनि कार्यक्रमको अभिलेखिकरण समयमै हुनुपर्छ भन्ने सन्देश दिएको बताउनु भयो । साहित्यकार प्रधानले कवि किसनसिंह धामीले नेपाली भाषा, साहित्य र संस्कृतिको संरक्षणमा पुर्याउनु भएको योगदान महत्वपूर्ण भएको विचार व्यक्त गर्नुभयो ।
प्रमोद प्रधान, अग्रज साहित्यकार तथा पत्रकार
प्राध्यापक डाक्टर तारा निरौलाले कवि किसनसिंह धामी भावनामा बग्ने व्यक्तित्व नभएर यर्थाथतालाई टेकेर हिड्ने स्रष्टा भएको बताउनुभयो । निरौलाले कवि किसनसिंह धामी विनम्र स्वभाव, सरल विचार र स्वच्छ व्यक्तित्व भएको धारणा पनि व्यक्त गर्नुभयो ।
तारा निरौला, प्राध्यापक डाक्टर
वरिष्ठ साहित्यिक तथा पत्रकार नगेन्द्रराज शर्माले किशनसिंह धामीले डायस्पोरामा बसेर नेपाली भाषा साहित्य र संस्कृतिको जगेर्नामा पुर्याउनु भएको कार्यको प्रशंसा गर्नुभयो । नेपाल स्रष्टा समाजका केन्द्रीय अध्यक्ष श्रीओम श्रेष्ठ ‘रोदन’को सभापतित्वमा सम्पन्न उक्त समारोहमा सुदुर पश्चिम नेपालको आकर्षक साँस्कृतिक झाँकी समेत प्रस्तुत गरिएको थियो ।
