वाशिङ्टन ।  चिनियाँ राष्ट्रपति सी जिनपिङ बुधबार वासिङ्टन आइपुग्दा अमेरिकी राष्ट्रपति डोनाल्ड ट्रम्पले उहाँलाई विमानस्थलमै पुगेर स्वागत गर्नुहुनेछ । सामान्यतया विदेशी नेतालाई ह्वाइट हाउसमा स्वागत गर्ने अभ्यास रहेकामा ट्रम्पले जोइन्ट बेस एन्ड्रयुजको धावनमार्ग मै सीलाई स्वागत गर्न लाग्नुभएको हो ।    
    
 ट्रम्पको यो निर्णयले एक दशकभन्दा बढी समयपछि पहिलो पटक अमेरिकाको राजकीय भ्रमणमा आउनुभएका चिनियाँ राष्ट्रपतिलाई दिइएको उच्च प्राथमिकता देखाउँछ । ह्वाइट हाउसका अनुसार ट्रम्पले सी र उहाँकी पत्नी पेङ लियुआनसँगै सैन्य आधारमा आगमन समारोहमा सहभागिता जनाउने अपेक्षा गरिएको छ ।    
    
 प्रथम महिला मेलानिया ट्रम्पले सी र पेङलाई उच्च सम्मानका साथ स्वागत गर्नुपर्ने बताउनुभएको छ । उहाँले सी र ट्रम्पबीचको सम्बन्ध राम्रो रहेको उल्लेख गर्दै चिनियाँ राष्ट्रपति अमेरिकी भूमिमा आउँदा उहाँलाई सम्मानपूर्वक स्वागत गर्नुपर्ने बताउनुभयो ।    
    
 सीको तीनदिने भ्रमणका क्रममा बिहीबार ह्वाइट हाउसमा औपचारिक आगमन समारोह तथा राजकीय भोज आयोजना हुनेछ । यस भ्रमणलाई ट्रम्पको यसै वर्षको मे महिनामा भएको चीन भ्रमणका क्रममा आफूले पाएको औपचारिक स्वागतको प्रत्युत्तरका रूपमा पनि हेरिएको छ ।    
    
 यद्यपि, उच्चस्तरीय स्वागत समारोह भइरहेका बेला अमेरिका–चीन सम्बन्ध व्यापार, कृत्रिम बुद्धिमत्ता, इरान र ताइवानलगायत विषयमा तनावपूर्ण छ । दुवै देशले सम्बन्धमा ‘रणनीतिक स्थिरता’ कायम राख्ने प्रयास गरिरहेका छन् । ट्रम्पले पछिल्ला महिनामा सीलाई ‘महान् नेता’ भन्दै उहाँसँगको सम्बन्धबारे सकारात्मक धारणा व्यक्त गर्नुभएको छ ।    
    
 सीलाई दिइने भव्य स्वागतप्रति केही अमेरिकी सांसदले आलोचना गरेका छन् । सिनेटको सशस्त्र सेवा समितिका अध्यक्ष रोजर विकरले चीनको सैन्य विस्तार र इरानसँगको सम्बन्धलगायत विषयमा सीसँग गम्भीर छलफल गर्न ट्रम्पलाई आग्रह गर्नुभएको छ ।    
    
 ट्रम्पले सीलाई प्रभावित पार्न भ्रमणको तयारीमा विशेष ध्यान दिनुभएको छ । उहाँले ह्वाइट हाउसमा निर्माण भइरहेको नयाँ हेलिकप्टर अवतरणस्थलको चर्चा गर्नुभएको छ ।    
    
 बिहीबार ह्वाइट हाउसमा औपचारिक स्वागत समारोह, सैन्य सम्मान गारदको निरीक्षण र राजकीय भोज आयोजना हुनेछ । भोजमा प्रविधि तथा व्यवसाय क्षेत्रका प्रमुख व्यक्ति सहभागी हुने अपेक्षा गरिएको छ । दुई नेताबीच व्यापार, प्रविधि तथा अन्य विवादित विषयमा बन्द कोठाभित्र छलफल हुनेछ ।    
    
 भ्रमणबाट ठूलो कूटनीतिक उपलब्धि हासिल हुने अपेक्षा भने सीमित रहेको समाचारमा उल्लेख छ । शुक्रबार सी र पेङले ट्रम्प दम्पतीसँग अनौपचारिक चियापान गर्ने तथा वासिङ्टनस्थित राष्ट्रिय अभिलेखालयको भ्रमण गर्ने कार्यक्रम छ । त्यहाँ उहाँहरूले अमेरिका–चीन सम्बन्धसँग सम्बन्धित ऐतिहासिक दस्तावेज अवलोकन गर्नुहुनेछ । एपी