- चार कारोबार दिनपछि नेप्सेमा सुधार ।
- कारोबार रकम बढेर रु. ४ अर्ब ४० करोड पुग्यो ।
- पाँच उपसमूहको परिसूचक बढ्दा सात उपसमूह घटे ।
रे समाचार/काठमाडौं । पछिल्ला चार कारोबार दिनदेखि घटिरहेको शेयर बजार मापक नेप्से आज भने ७.१७ अंकले बढेर २६२९.४९ विन्दुमा पुगेको छ । कारोबार रकम पनि बढेर रु. ४ अर्ब ४० करोड १४ लाख ९ हजार बराबर पुगेको छ ।
हिजो रु. ३ अर्ब २९ करोड बराबरको शेयर खरिदबिक्री भएकामा आज कारोबार रकम बढेको हो ।
आज माउन्ट एभरेस्ट पावर डेभलपमेन्ट र सर्वोत्तम पेन्ट्सको शेयर सकारात्मक सर्किट लेभलमा कारोबार भएको छ । माउन्ट एभरेस्ट पावरको शेयर मूल्य लगातार सातौँ कारोबार दिन सकारात्मक सर्किट लेभलमा कारोबार भएको हो भने सर्वोत्तम पेन्ट्सको शेयर लगातार छैटौँ कारोबार दिन सकारात्मक सर्किट लेभलमा कारोबार भएको छ ।
यसैगरी, एनआईसी एसिया सेलेक्ट फन्डको इकाइमूल्य साढे ६ प्रतिशतभन्दा बढीले बढेको छ । कुमारी धनवृद्धि योजनाको इकाइमूल्य भने आज सर्वाधिक ९.७७ प्रतिशतले घटेको छ ।
कारोबार रकमका आधारमा आज नौ वर्षे एग्रिकल्चर बन्ड शीर्ष स्थानमा रहेको छ। उक्त बन्डको रु. ५० करोड ६५ लाख बराबरको कारोबार भएको छ । रिलायन्स स्पिनिङ मिल्सको कारोबार रकम रु. ३० करोड नाघेको छ भने सोलु हाइड्रोपावरको करिब रु. २३ करोड बराबरको शेयर किनबेच भएको छ ।
१३ वटा उपसमूहमध्ये आज पाँच उपसमूहको परिसूचक बढेको छ भने सात उपसमूहको परिसूचक घटेको छ ।
