• नेप्से ७.२५ अंकले बढेर २ हजार ७२६.४९ विन्दुमा बन्द ।
• कारोबार रकम बढेर ६ अर्ब ६७ करोड रुपैयाँ नाघ्यो ।
• रिडी पावर सर्वाधिक कारोबार गर्ने कम्पनी बन्यो, एभरेष्ट कलरको शेयर सकारात्मक सर्किटमा ।

रे समाचार/काठमाडौं । साताको दोस्रो कारोबार दिन मंगलबार नेपाल स्टक एक्सचेन्ज (नेप्से) परिसूचक सामान्य अंकले बढेर बन्द भएको छ । पछिल्ला पाँच कारोबार दिनदेखि निरन्तर उकालो लागेको बजारले मंगलबार पनि सोही लयलाई निरन्तरता दिएको हो ।

यस दिन नेप्से परिसूचक ७.२५ अंकले बढेर २ हजार ७२६.४९ विन्दुमा पुगेको छ । सेन्सेटिभ इन्डेक्स भने ०.१८ अंकले घटेको छ । फ्लोट इन्डेक्स ०.१९ अंकले बढ्दा सेन्सेटिभ फ्लोट इन्डेक्स स्थिर रहेको छ ।

नेप्सेसँगै कारोबार रकममा पनि वृद्धि भएको छ । सोमबार ५ अर्ब ५१ करोड रुपैयाँ बराबरको कारोबार भएको बजारमा मंगलबार ३४३ वटा स्टकको ७५ हजार १० पटक कारोबार हुँदा ६ अर्ब ६७ करोड १० लाख १७ हजार रुपैयाँ बराबरको १ करोड ४९ लाख २४ हजार कित्ता शेयर किनबेच भएको छ ।

यस दिन एभरेष्ट कलर लिमिटेडको शेयर सकारात्मक सर्किट लेभलमा कारोबार भएको छ । कम्पनीको शेयरमूल्य ५५ रुपैयाँ ८० पैसा बढेर ४२८ रुपैयाँ २० पैसामा अन्तिम कारोबार भएको छ । कालंगा हाइड्रोको शेयरमूल्य ७.५ प्रतिशतभन्दा बढी बढेको छ भने बोटलर्स नेपाल (बालाजु) को शेयरमूल्य पनि करिब साढे ७ प्रतिशतले उकालो लागेको छ ।

अर्कोतर्फ, ७ प्रतिशत नबिल डिबेञ्चर २०८९ को मूल्य सर्वाधिक ७.४४ प्रतिशतले घटेको छ ।

कारोबार रकमका आधारमा रिडी पावर कम्पनी शीर्ष स्थानमा रहेको छ । कम्पनीको ५५ करोड ७७ लाख रुपैयाँ बराबरको शेयर कारोबार भएको छ । आँखु खोला जलविद्युत कम्पनीको करिब ३१ करोड ५० लाख रुपैयाँ बराबरको कारोबार हुँदा रिलायन्स स्पिनिङ मिल्सको कारोबार रकम २७ करोड रुपैयाँभन्दा माथि पुगेको छ ।

मंगलबार कारोबार भएका १३ उपसमूहमध्ये पाँच उपसमूहको परिसूचक बढेको छ भने आठ उपसमूहको परिसूचक घटेको छ । व्यापार उपसमूहको परिसूचक सर्वाधिक २.८८ प्रतिशतले बढेको छ । अन्य उपसमूहको परिसूचक पनि १ प्रतिशतभन्दा बढीले बढ्दा बैंकिङ, लगानी तथा उत्पादन तथा प्रशोधन उपसमूहमा सामान्य वृद्धि देखिएको छ ।