रमेश हतुवाली/काठमाण्डू । नेपालस्थित चिनियाँ राजदूतावासका मिनिस्टर काउन्सिलर चौ फानले चीन नेपालसँग विकासका अवसरहरू बाँड्न तयार रहेको बताउनु भएको छ । 

नेपाल र चीनबीच कूटनीतिक सम्बन्ध स्थापना भएको ७० वर्षको अवसरमा काठमाण्डूस्थित रे मिडिया ग्रुप र सिजिटिएन नेपाली विभागको सहकार्यमा आज आयोजित नेपाल-चीन सम्वन्धको ७० बर्ष 'सम्झना र समिक्षा' विषयक अन्तरक्रियामा बोल्नुहुँदै चौ फानले सो विचार व्यक्त गर्नुभएको हो ।  

युवा, शिक्षा, संस्कृति, पर्यटन, रेडियो र टेलिभिजन, अनलाइन श्रव्यदृश्य उत्पादनहरू र थिंक ट्याङ्क जस्ता क्षेत्रहरूमा आदानप्रदान र सहयोगलाई अझ बलियो बनाउन चीन इच्छुक रहेको उहाँले बताउनुभयो । 'हामी आशा गर्छौं कि यी क्षेत्रका नेपाली साथीहरूले पारस्परिक समझदारीको लिङ्क र साँस्कृतिक आदानप्रदानका दूतको रूपमा सेवा गर्दै चिनियाँ समकक्षी साझेदारहरूसँगको सहकार्यलाई निरन्तर सुदृढ गर्नेछन्' चौ फानले भन्नुभयो । 

'विगत सात दशकमा, दुई देशहरूको राजनीतिक विश्वास गहिरो भएको छ, आर्थिक सहयोग विस्तार भएको छ, जनता-जनता आदानप्रदान फस्टाएको छ र सबै क्षेत्रहरूमा सहकार्यले प्रशस्त फल दिएको छ, जसले फरक सामाजिक प्रणाली र फरक आकारका देशहरूबीच मैत्रीपूर्ण सहअस्तित्वको उदाहरण स्थापित गरेको छ ।' चौ फानले भन्नुभयो । 

सम्बोधनको पूर्णपाठ

चीन र नेपाल पहाड र नदीहरूले जोडिएका छिमेकी हुन् । हाम्रो मित्रताको जरा हजारौं वर्ष पुरानो छ । काठमाण्डू उपत्यकालाई आकार दिन विशाल ताल भएको समयमा महामञ्जुश्रीको कथादेखि, चिनियाँ भिक्षु फा सियान र स्वान चाङको लुबिनीसम्मको यात्राले हामी दुई देशबीचको सम्बन्धलाई प्राचिनकालमै जोडेको पाईन्छ । 

नेपाली राजकुमारी भृकुटी र तिब्बतका राजा सनचन गम्पोको ऐतिहासिक विवाहदेखि चीनको राजधानी पैचिङमा मियाओ यिङ मन्दिर निर्माण गर्न मद्दत गर्ने प्रशिद्ध शिल्पकार अरनिकोको यात्रासम्मले हाम्रो इतिहास साझा सम्बन्धले भरिएको देखिन्छ । यस वर्ष चीन र नेपालबीच कूटनीतिक सम्बन्ध स्थापना भएको ७० औं वार्षिकोत्सव हो ।

विगत सात दशकमा, दुई देशहरूको राजनीतिक विश्वास गहिरो भएको छ, आर्थिक सहयोग विस्तार भएको छ, जनता–जनता आदानप्रदान फस्टाएको छ र सबै क्षेत्रहरूमा सहकार्यले प्रशस्त फल दिएको छ, जसले फरक सामाजिक प्रणाली र फरक आकारका देशहरूबीच मैत्रीपूर्ण सहअस्तित्वको उदाहरण स्थापित गरेको छ ।

साँस्कृतिक आदानप्रदान हाम्रो सम्बन्धको आधार बनेको छ, सञ्चारमाध्यमहरुले महत्वपूर्ण पुलको रूपमा काम गरिरहेका छन् । चीन र नेपालका सञ्चारमाध्यमबीचको फलदायी र सफल सहकार्य हेर्न पाउनु उत्साहजनक छ । एक महिना अघि म नेपाल आएदेखि हाम्रा मिडियाका साथीहरू सहित नेपाली जनताको मित्रता र न्यानोपनबाट म गहिरो रूपमा प्रभावित भएको छु ।

रे मिडिया ग्रुप नेपाल र चाइना स्टडी सेन्टरद्वारा प्रकाशित पत्रिकाहरूको विशेष संस्करणहरूले हाम्रो कूटनीतिक सम्बन्धको विकासको यात्रालाई जीवन्त रूपमा चित्रण गर्दछन् । सात दशकको स्थायी मित्रताको अर्थपूर्ण साक्षीको रूपमा यी पत्रिकाहरुले काम गर्दछन् । केही समय अघि, चिनियाँ कम्युनिष्ट पार्टीको २० औं केन्द्रीय समितिको चौथो पूर्ण बैठकले आर्थिक तथा सामाजिक विकासका लागि १५ औं पञ्चवर्षीय योजना तर्जुमा गर्न सिफारिसहरू पारित ग¥यो । त्यो योजनाले आगामी पाँच वर्षकाक लागि चीनको आर्थिक तथा सामाजिक विकासका प्राथमिकताहरूको रूपरेखा प्रस्तुत गर्दछ । यसले जोड दिन्छ कि हामीले व्यापार, लगानी, औद्योगिक विकास र जनता–जनताबीचको आदानप्रदानका क्षेत्रमा व्यावहारिक सहयोगलाई गहिरो बनाउनुपर्छ र हरित विकास, एआई, डिजिटल अर्थतन्त्र, स्वास्थ्य, पर्यटन र कृषि जस्ता क्षेत्रहरूमा नयाँ सहयोग पहलहरू सुरु गर्नुपर्छ ।

हामीले अन्य संस्कृतिहरूसँग गहिरो आदानप्रदान र पारस्परिक सिकाइमा संलग्न हुनुपर्छ, जनता–जनताबीचको आदानप्रदान र सहयोग व्यापक रूपमा सञ्चालन गर्नुपर्छ भन्ने कुरालाई पनि सो योजनाले प्रकाश पार्छ । यस प्रकारका पहलले हाम्रा दुई देशहरूबीचको संस्कृति र जनता–जनतामाझ विद्यमान सम्बन्धमा थप सहकार्यका लागि नयाँ युगको संकेत गर्नेछ ।

चीन नेपालसँग विकासका अवसरहरू बाँड्न तयार छ । युवा, शिक्षा, संस्कृति, पर्यटन, रेडियो र टेलिभिजन, अनलाइन श्रव्यदृश्य उत्पादनहरू र थिंक ट्याङ्क जस्ता क्षेत्रहरूमा आदानप्रदान र सहयोगलाई अझ बलियो बनाउन इच्छुक छ । हामी आशा गर्छौं कि यी क्षेत्रका नेपाली साथीहरूले पारस्परिक समझदारीको लिङ्क र साँस्कृतिक आदानप्रदानका दूतको रूपमा सेवा गर्दै चिनियाँ समकक्षी साझेदारहरूसँगको सहकार्यलाई निरन्तर सुदृढ गर्नेछन् । आउनुहोस्, हामी हाम्रो कूटनीतिक सम्बन्धमा यस क्षणलाई ऐतिहासिक कोसेढुङ्गाको रुपमा मनाऔं र विकास र समृद्धिका लागि अनन्त मित्रता प्रस्तुत गर्दै सहयोगको हाम्रो रणनीतिक साझेदारीको नयाँ प्रगति गरौं । हाम्रो मित्रता सधैंभरि टिकिरहोस् र हाम्रा जनताले आगामी ७० वर्षमा ट्रान्स–हिमालयमा असल छिमेकीपन र मित्रताको नयाँ अध्याय लेखून् । धन्यवाद