- लगातारको वर्षाले नदी तथा खोलामा जलसतह बढ्यो ।
- सुरक्षाकर्मी नदी करिडोरमा निरन्तर निगरानीमा ।
- सम्भावित जोखिम पहिचान र प्रतिकार्यमा सरकार सक्रिय ।
काठमाडौँ । लगातारको वर्षाका कारण प्रमुख बागमती, विष्णुमती, मनोहरालगायत नदी तथा खोलामा जलसतह बढेको छ । सशस्त्र प्रहरी, नेपाल प्रहरीसहितका सुरक्षाकर्मीले नदी करिडोर क्षेत्रमा निरन्तर अनुगमन गरिरहेका छन् ।
यसैबीच गृहमन्त्री सुधन गुरुङले ललितपुरको च्यासलस्थित नेपाल कम्युनिष्ट पार्टी (एमाले)को मुख्यालय आसपासका क्षेत्रमा पुगेर खोला तथा पानीको बहावको अवस्थाबारे सुरक्षाकर्मीसँग जानकारी लिनुभएको छ ।
सो क्रममा सञ्चारकर्मीसँग सङ्क्षिप्त कुरा गर्दै उहाँले सुरक्षाकर्मी उच्च सतर्कताका साथ कार्यक्षेत्रमा खटिएको बताउनुभयो । मनसुनजन्य विपद्बाट हुनसक्ने सम्भावित जोखिम पहिचान तथा प्रतिकार्यमा सरकार गम्भीरताका साथ लागिरहेको उहाँले बताउनुभयो ।
बङ्गालको खाडीमा विकसित न्यून चापीय प्रणालीको प्रभावले देशका अधिकांश भूभागमा वर्षा भइरहेको छ । मौसम विज्ञान विभागका अनुसार पछिल्लो २४ घण्टामा कोशी, बागमती, गण्डकी र लुम्बिनी प्रदेशका अधिकांश स्थानमा भारी तथा केही स्थानमा धेरै भारी वर्षा भएको छ । रासस
