- अडिट-३ टनेलभित्र डन्डीको जालीमा अल्झिएका ६ वटा शव फेला ।
- ग्राइन्डर, ग्यास कटर र रोटरी रेस्क्यु प्रयोग गरी शव बाहिर निकालियो ।
- टनेलभित्र हिलोमा छोपिएको शवजस्तो आकृति देखिएपछि खोजी जारी ।
रे समाचार/काठमाडौँ । रसुवाको भोटेकोशीमा आएको विनाशकारी बाढीमा परी सम्पर्कविहीन भएका माथिल्लो त्रिशूली-१ जलविद्युत् आयोजनाका व्यक्तिहरूको खोजीका क्रममा थप ६ शव वटा फेला परेका छन् ।
नेपाली सेनाका अनुसार आयोजनाका प्रतिनिधिसहितको संयुक्त उद्धार टोलीले खोजी गर्ने क्रममा अडिट-३ टनेलभित्र ढलानका लागि बुनिएको डन्डीको जालीको भित्री भागमा अल्झिएको अवस्थामा ती शव फेला पारेका हुन् ।
टनेलभित्र अल्झिएका शवलाई ग्राइन्डर, ग्यास कटर र रोटरी रेस्क्यु उपकरणको प्रयोग गरी बाहिर निकालिएको नेपाली सेनाले जनाएको छ ।
खोजीका क्रममा टनेलभित्र हिलोले छोपिएको अवस्थामा अन्य शवजस्तो आकृति समेत देखिएको सेनाको विज्ञप्तिमा उल्लेख छ । उक्त क्षेत्रमा थप खोजी कार्य भइरहेको छ ।
भाद्र १० गते रसुवाको भोटेकोसी नदीमा आएको बाढीका कारण माथिल्लो त्रिशूली-१ जलविद्युत् आयोजनामा कार्यरत केही व्यक्ति सम्पर्कविहीन भएका थिए । उनीहरूको खोजीका लागि आयोजनाका प्रतिनिधिसहित संयुक्त उद्धार टोली परिचालन गरिएको छ ।
