- चितवनमा फेला परेका ३६४ शवमध्ये १४ को पहिचान ।
- हराइरहेका व्यक्तिका ८१ आफन्तको डिएनए नमूना सङ्कलन ।
- ३४९ शवको सुरक्षित व्यवस्थापन, एउटा शव बाँकी ।
नारायणगढ (चितवन) । रसुवाको भोटेकोशीमा गएको बाढीपछि चितवनमा ३६४ जनाको शव फेला परेकामा १४ शवको पहिचान भएको छ ।
हराइरहेका व्यक्तिको पहिचानका लागि उनीहरूका ८१ जना आफन्तको डिएनए नमूना सङ्कलन गरिएको छ ।
जिल्ला प्रहरी कार्यालयका प्रहरी उपरीक्षक रामेश्वर पौडेलका अनुसार हालसम्म जिल्लामा फेला परेका अधिकांश शव पहिचान गर्न नसकिने अवस्थामा रहेकाले डिएनए परीक्षण तथा कानुनी प्रक्रियामार्फत व्यवस्थापन गरिएको हो ।
पहिचान खुलेका शव आवश्यक कानुनी प्रक्रिया पूरा गरी आफन्तको जिम्मा लगाइएको उहाँले जानकारी दिनुभयो ।
पहिचान खुल्न नसकेका ३४९ शवको सुरक्षित व्यवस्थापन गरिसकिएको प्रहरी उपरीक्षक पौडेलले बताउनुभयो । हाल एउटा शवको मात्र व्यवस्थापन गर्न बाँकी छ ।
व्यवस्थापन गरिएका सबै शवको डिएनए नमूना सुरक्षित राखिएको उहाँले बताउनुभयो ।
हराइरहेका व्यक्तिको पहिचान खुलाउन प्रहरीले आफन्तको डिएनए नमूना सङ्कलनलाई पनि प्राथमिकता दिएको छ । सङ्कलन गरिएका डिएनए नमूना विधिविज्ञान प्रयोगशाला पठाइएको छ । रासस
-1789570284.jpg)
