काठमाण्डू । रसुवास्थित भोटेकोशी नदीमा यही भदौ १० गते आएको विनाशकारी बाढीमा परी सोमबार साँझसम्म ९३९ जनाको शव फेला परेको छ भने तीन हजार ९२५ जना अझै सम्पर्कविहीन रहेका छन् ।    
    
 राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीबाट रसुवा, नुवाकोट, धादिङ, गोरखा, नवलपरासी पूर्व तथा पश्चिम, तनहुँ र चितवनलगायत जिल्ला प्रभावित भएका छन् ।    
    
 फेला परेका शवमध्ये रसुवामा २३, नुवाकोटमा ९५, धादिङमा ५५, गोरखामा ६५, नवलपरासी पूर्वमा २१६, नवलपरासी पश्चिममा १६८, तनहुँमा ३८ र चितवनमा २७९ जना रहेका प्राधिकरणले जनाएको छ ।    
    
 प्राधिकरणका प्रवक्ता शान्ति महतका अनुसार बाढी प्रभावित क्षेत्रबाट सोमबार साँझसम्म ११ हजार ३७९ जनाको उद्धार गरिएको छ । उद्धारसँगै सम्पर्कविहीनको खोजी कार्यलाई तीव्र बनाइएको छ ।    
    
राससका अनुसार नेपाली सेनाले मात्रै तीन हजार ४०४ नेपाली र २५३ विदेशी नागरिकको हवाई उद्धार गरेको छ । खोज तथा उद्धारका क्रममा सेनाले हालसम्म ४९९ पटक हवाई उडान गरेको छ । सोमबार मात्रै सेनाले ८८ र निजी क्षेत्रका हेलिकोप्टरले २९ वटा हवाई उडान गरेको प्राधिकरणले जनाएको छ ।    
    
 प्रभावित क्षेत्रमा खोज तथा उद्धारका लागि नेपाल प्रहरीका सात हजार ९०९, नेपाली सेनाका आठ हजार ८९६ र सशस्त्र प्रहरी बल नेपालका चार हजार २०३ गरी २१ हजार आठ जना सुरक्षाकर्मी परिचालन गरिएको छ ।    
    
 यसैबीच, बाढी प्रभावित नागरिकका लागि खाद्यान्न, गैरखाद्य सामग्री, औषधि तथा स्वास्थ्य सामग्री पठाउने कार्यलाई निरन्तरता दिइएको प्राधिकरणले जनाएको छ ।