• भोटेकोशी बाढीमा बेपत्ता आफन्तको खोजीमा परिवारजन अस्पतालदेखि नदी किनारसम्म ।
• पाँच दिनदेखि खोजी जारी, जीवित भेटिने आशा अझै कायमै ।
• उमा गोलेका छोराछोरीसहित सम्राट शेर्पा र अन्य बेपत्ताको खोजी जारी ।

प्रकाश सिलवाल/काठमाडौँ । भोटेकोशी बाढीमा बेपत्ता भएका आफन्तको खोजीमा परिवारजन पाँच दिनदेखि विभिन्न अस्पताल, प्रहरी कार्यालय र सम्भावित स्थानमा तस्बिरसहित भौँतारिरहेका छन् । जीवितै भेटिने आशा कमजोर बन्दै गए पनि उनीहरूले खोजी भने जारी राखेका छन् ।

भदौ १० गतेदेखि नुवाकोट र रसुवाको सीमामा पर्ने बेत्रावतीकी उमा गोले र उनका छोराछोरी बाढीपछि बेपत्ता छन् । उनकी बहिनी बिमा गोले दिदी र भान्जाभान्जीको खोजीमा विभिन्न निकाय तथा स्थानमा पुगिरहेकी छन् ।

दिदी कसरी बेपत्ता हुनुभयो र अहिले उहाँहरूको अवस्था के छ भन्नेबारे बिमालाई कुनै जानकारी छैन । आफन्तका तस्बिर बोकेर विभिन्न स्थानमा पुगिरहेकी उनी दिदीबारे कुरा गर्दा भावुक हुन्छिन् ।

“दिदी र छोराछोरीको केही खबर पाइन्छ कि भन्ने आशामा यताउता खोज्दै हिँडेकी छु”, बिमाले भनिन् । यति भन्दै गर्दा उनको आँसु थामिएन ।

बिमाका अनुसार भदौ १० गते प्रकोप आउनुअघि बिहान ९ बजेर १४ मिनेटसम्म उमा गोलेसँग फोन सम्पर्क भएको थियो । “भाग, भाग, भाग्नुपर्छ” भन्दै कुराकानी भइरहेका बेला एकाएक फोन सम्पर्क टुटेको उनले लामो श्वास तान्दै बताइन् ।

त्यसपछि उमासहित उनका छोराछोरीको कुनै खबर आएको छैन । “जीवित भेटिने आशा कम हुँदै गएको छ, तर कतै भेटिन्छन् कि भन्ने आशा अझै मरेको छैन”, बिमाले बताइन् ।

त्यस्तै, दाङ घर भएकी धनसरी नेपाली रसुवागढीमा बाढीका क्रममा बेपत्ता भएका आफ्ना २६ वर्षीय छोरा निरज नेपालीको खोजीमा विभिन्न स्थानमा पुगिरहेकी छन् । रसुवागढीमा जेसीबी चालकका रूपमा कार्यरत निरज बाढीपछि अहिलेसम्म सम्पर्कमा आएका छैनन् ।

छोराको खोजीमा धनसरी विभिन्न निकाय र सम्भावित स्थानमा पुगेर बिलौना गरिरहेकी छन् । बर्दियाका शिवबहादुर थारू पनि रसुवाको मैलुङबाट बेपत्ता भएका छन् । उनको खोजीमा भाइ सुमावीर थारू विभिन्न स्थानमा पुगिरहेका छन् ।

बाढीमा सर्वसाधारणसँगै सुरक्षाकर्मीसमेत बेपत्ता भएका छन् । चिमुरे प्रहरी कार्यालयमा कार्यरत प्रहरी जवान सम्राट शेर्पा बाढीका बेला प्रहरी भ्यानसहित बेपत्ता भएका हुन् ।

रामेछापको गोकुलगङ्गा-३ घर भएका शेर्पाको खोजीका लागि उनका काका गणेश शेर्पाले शिक्षण अस्पताल, धुन्चे, जिल्ला प्रहरी कार्यालयलगायत विभिन्न स्थानमा खोजी गरिरहेका छन् ।

गणेशका अनुसार आफन्तहरूको टोलीलाई सम्भव भएसम्म त्रिशूलीसम्म पठाइएको छ । रसुवा जान सक्ने अवस्था नरहेकाले चितवनको नारायणगढस्थित नारायणी नदी किनारमा समेत खोजीका लागि मानिसहरू पठाइएको तर अहिलेसम्म सम्राटको कुनै खबर प्राप्त हुन नसकेको उनले बताए ।

त्यसैगरी, रामेछापका धनलाल तामाङ आफ्ना आफन्त दलबहादुर तामाङको खोजीमा छन् । ककनी गाउँपालिका-३, नुवाकोट निवासी दलबहादुर रसुवागढी भन्सारमा कार्यरत थिए । बाढी आएको दिनदेखि उनी पनि बेपत्ता छन् ।

भोटेकोशीको बाढीले धेरै परिवारलाई शोक, पीडा र अनिश्चितताको अवस्थामा पुर्‍याएको छ । बेपत्ता आफन्तको खोजीमा परिवारजन अस्पतालदेखि नदी किनारसम्म पुगिरहेका छन् ।

समय बित्दै जाँदा आशा कमजोर बन्दै गए पनि आफ्ना प्रियजन कतै जीवित भेटिने विश्वास उनीहरूले अझै त्यागेका छैनन् । रासस