- मस्कटमा नेपाल-ओमान व्यापार तथा लगानी प्रवर्द्धन कार्यक्रम ।
- निर्यात, लगानी र व्यावसायिक सहकार्य विस्तारमा जोड ।
- ७० भन्दा बढी नेपाली र ओमानी व्यवसायीको सहभागिता ।
काठमाडौँ । काठमाडौँ, २१ साउनः ओमानको मस्कटस्थित नेपाली राजदूतावासले नेपाल–ओमानबीच व्यापार तथा लगानी प्रवर्द्धन गर्ने उद्देश्यले ‘व्यापार तथा सम्बन्ध स्थापना’ विषयक कार्यक्रम आयोजना गरेको छ । कार्यक्रममा नेपालबाट निर्यातयोग्य उत्पादन, नेपालमा उपलब्ध लगानीका अवसर तथा दुवै देशका व्यवसायीबीच व्यावसायिक सम्बन्ध विस्तारका विषयमा छलफल गरिएको छ ।
राजदूतावासका अनुसार कार्यक्रममा कार्यवाहक राजदूत विशेषकुमार साहले व्यापार तथा लगानी प्रवर्द्धनका लागि ओमान नेपालका महत्त्वपूर्ण साझेदारमध्ये एक रहेको बताउनुभयो । नेपालबाट पहिलोपटक उच्चस्तरीय व्यापारिक प्रतिनिधिमण्डलको भ्रमण भएकोमा खुशी व्यक्त गर्दै उहाँले नेपालमा उपलब्ध लगानीका अवसर, लगानी प्रक्रिया, संस्थागत व्यवस्था तथा ओमानी लगानीकर्ताका लागि नेपाल किन आकर्षक गन्तव्य हुन सक्छ भन्ने विषयमा प्रस्तुति दिनुभयो ।
प्रस्तुतिपछि उहाँले सगरमाथा आरोहण गर्ने पहिलो ओमानी महिला नादिरा अल हार्थी तथा हिमपहिरोमा परी निधन भएका अन्य पर्वतारोहीप्रति श्रद्धाञ्जली अर्पण गर्नुभयो ।
निर्यात व्यवसारी महासङ्घ नेपालका अध्यक्ष गोविन्द घिमिरेले नेपालबाट निर्यात गर्न सकिने प्रतिस्पर्धात्मक लाभ भएका उत्पादनको सम्भावना तथा निर्यातमुखी अर्थतन्त्र प्रवर्द्धनका लागि महासङ्घले गरिरहेका प्रयासबारे जानकारी गराउनुभयो ।
नेपाल हस्तकला महासङ्घका अध्यक्ष रविन्द्र शाक्यले नेपाली हस्तकलाको मौलिकता, परम्परागत सीप तथा ओमानसहित खाडी मुलुकमा रहेका व्यापारिक सम्भावनाबारे प्रस्तुति दिनुभयो ।
कार्यक्रममा विभिन्न नेपाली उत्पादनको प्रदर्शनीसमेत गरिएको थियो । नेपालबाट गएको उच्चस्तरीय व्यापारिक प्रतिनिधिमण्डल, ओमानस्थित व्यवसाय तथा हाइपरमार्केटका प्रमुख कार्यकारी अधिकृत, निर्देशक, प्रतिनिधि, सञ्चारकर्मी तथा ओमानस्थित नेपाली व्यवसायीसहित ७० भन्दा बढीको सहभागिता रहेको राजदूतावासले जनाएको छ । रासस
