- फोरजी विस्तार र फाइभजी सुरुआतलाई चालु आर्थिक वर्षको प्राथमिकतामा राखिने ।
- दूरसञ्चार सेवाको पहुँच र गुणस्तरमा देखिने गरी सुधार गर्न निर्देशन ।
- सार्वजनिक सञ्चार संस्थालाई व्यावसायिक र प्रतिस्पर्धी बनाउने प्रतिबद्धता ।
काठमाडौँ । सूचना तथा सञ्चारमन्त्री डा. विक्रम तिमिल्सिनाले चालु आर्थिक वर्ष २०८३/८४ लाई नेपालको दूरसञ्चार सेवामा अभूतपूर्व सुधारको वर्ष बनाउने सरकारको लक्ष्य रहेको रहेको बताउनुभएको छ । उहाँले सरकारको लक्ष प्राप्तिका लागि टेलिफोन तथा इन्टरनेट सेवाको पहुँच विस्तार एवम् गुणस्तर सुधारमा उल्लेखनीय परिवर्तन देखिने गरी काम गर्न मन्त्रालय र मातहतका निकायलाई निर्देशन दिनुभएको छ ।
सूचना तथा सञ्चार मन्त्रालयमा आज आयोजित गत आर्थिक वर्ष २०८२/८३ को वार्षिक प्रगति समीक्षा तथा मन्त्रालयस्तरीय विकास समस्या समाधान समितिको बैठकलाई सम्बोधन गर्नुहुँदै मन्त्री तिमिल्सिनाले दूर दराजसम्म फोरजी सेवाको विस्तार, फाइभजी सेवाको सुरुआत, सेवाको गुणस्तर सुधार तथा नागरिकलाई प्रभावकारी सेवा प्रवाहलाई मन्त्रालयले चालु आर्थिक वर्षको प्रमुख प्राथमिकतामा राखेको स्पष्ट पार्नुभयो ।
सञ्चारमन्त्री तिमिल्सिनाले विगतका वर्षमा निर्धारण गरिएका लक्ष्य अपेक्षित रूपमा हासिल हुन नसकेको उल्लेख गर्दै अब परिणाम देखिने गरी काम गर्नुपर्ने समय आएको बताउनुभयो । उहाँले दूरसञ्चार क्षेत्रमा सुधारका लागि आवश्यक नीतिगत, कानुनी तथा अन्तरनिकाय समन्वयमा मन्त्रालयले पूर्ण सहयोग गर्ने प्रतिबद्धता व्यक्त गर्नुहुँदै कार्यान्वयनमा भने कुनै ढिलासुस्ती स्वीकार्य नहुनेसमेत स्पष्ट पार्नुभयो ।
“यो वर्ष टेलिफोन र इन्टरनेट सेवा सुधारको वर्ष हुनेछ । पहुँच र गुणस्तरका सवालमा हामी अभूतपूर्व परिवर्तनको लक्ष्यसहित अघि बढिरहेका छौँ । सरकारले दूरसञ्चार क्षेत्रलाई आगामी आर्थिक वर्षको सबैभन्दा महत्वाकांक्षी क्षेत्रका रूपमा लिएको छ । नेपालमा दूरसञ्चार सेवामा अभूतपूर्व विकास र प्रगति हुने वर्षका रूपमा यसलाई स्थापित गनुपर्ने जिम्मेवारीबोध सबैले गर्नुहोला,” कर्मचारीलाई निर्देशन दिनुहुँदै उहाँले भन्नुभयो, “सरकारले राखेको लक्ष्य र उद्देश्य प्राप्त नगरी बस्न कसैलाई पनि छुट छैन । फोरजी विस्तार र फाइभजी सेवा सुरु गर्ने विषयमा नतिजा हासिल गर्न नसक्ने अवस्था अब स्वीकार्य हुँदैन । म आफै हरेक दिन खटिन तयार छु । नीतिगत वा कानुनी रूपमा जे सहयोग आवश्यक पर्छ, त्यसका लागि मन्त्रालय पूर्ण रूपमा तयार छ । कुन निकायसँग कस्तो समन्वय गर्नुपर्ने हो, त्यसमा हामी सबै जिम्मेवार भएर अघि बढ्नुपर्नेछ ।” उहाँले काम गर्ने संस्कृतिमा परिवर्तन आवश्यक रहेको उल्लेख गर्नुहुँदै कुनै पनि कर्मचारी वा निकायलाई निष्क्रिय भएर बस्ने छुट नरहेको बताउनुभयो । मन्त्रालय र मातहतका निकायबीच समन्वय कमजोर रहेको आफूले महसुस गरेको उल्लेख गर्नुहुँदै सञ्चारमन्त्री तिमिल्सिनाले त्यसलाई तत्काल सुधार गर्न निर्देशन दिनुभयो ।
“काम नगरेर बस्न कसैलाई पनि छुट छैन । अन्तरनिकाय सम्बन्ध र समन्वय कमजोर रहेको महसुस गरिरहेको छु । यस्तो अवस्था दोहोरिनु हुँदैन । विधि र कानुनको पूर्ण पालना गर्दै नतिजामुखी रूपमा काम गर्नुहोला,” सञ्चारमन्त्री तिमिल्सिनाले भन्नुभयो, “हामीले परिणाम देखिने गरी काम गर्नुपर्नेछ । त्यसका लागि समग्र संरचनागत सुधार आवश्यक छ ।” उहाँले विगतका कमजोरीबाट पाठ सिकेर अगाडि बढ्नुपर्ने आवश्यकता औँल्याउँदै सरकारी सेवाप्रति नागरिकबाट आउने गुनासो घटाउन कार्यसम्पादन सुधार अपरिहार्य रहेको बताउनुभयो ।
“एक दिन मात्र गम्भीर भएर समस्याको समाधान हुँदैन । हरेक दिन आफ्नो जिम्मेवारी सम्झेर काम गर्नुहोला । हामी सबै प्रतिबद्ध भएर कार्यसम्पादन प्रभावकारी बनाउनुपर्नेछ । उपलब्ध स्रोत, साधन र क्षमताको अधिकतम उपयोग गर्न सके मात्रै नागरिकले सरकारी काममा परिवर्तन महसुस गर्न सक्छन्,” उहाँले भन्नुभयो ।
बैठकमा सञ्चारमन्त्री तिमिल्सिनाले मन्त्रालय तथा मातहतका निकायको कमजोर पुँजीगत खर्च र कार्यान्वयन क्षमताप्रति पनि असन्तुष्टि व्यक्त गर्नुभयो । सम्बन्धित निकायले आफैं समाधान गर्न सक्ने विषय मन्त्रालयस्तरीय समितिसम्म पुग्नु व्यवस्थापकीय कमजोरी भएको उल्लेख गर्दै समयमै समस्या समाधान गर्ने कार्यसंस्कृति विकास गर्नसमेत निर्देशन दिनुभयो ।
गोरखापत्र संस्थान, राष्ट्रिय समाचार समिति(रासस) र सार्वजनिक सेवा प्रसारण संस्थालाई थप प्रभावकारी, व्यावसायिक तथा प्रतिस्पर्धी बनाउन सरकारले आवश्यक सुधारका काम थालिसकेको सञ्चारमन्त्री तिमिल्सिनाको भनाइ थियो । उहाँले सार्वजनिक सञ्चार संस्थाको अवस्था सुधार आवश्यक रहेको उल्लेख गर्दै भन्नुभयो, “लामो इतिहास बोकेका सार्वजनिक सञ्चार संस्थाहरूलाई जीर्ण अवस्थामा पुर्याइएको छ । ती संस्थाका समाचार सामग्रीको गुणस्तरप्रति म चिन्तित छु । समाचार कक्षहरूलाई अझ व्यावसायिक, प्रतिस्पर्धी र उत्तरदायी बनाउनुपर्ने आवश्यकता छ । सार्वजनिक सञ्चार संस्थाले विश्वसनीयता, गुणस्तर र प्रतिस्पर्धात्मक क्षमता बढाउनैपर्छ ।”
सञ्चारमन्त्री तिमिल्सिनाले मन्त्रालय र मातहतका निकायमा बाँकी रहेका आन्तरिक लेखापरीक्षण चालु आर्थिक वर्षभित्रै सम्पन्न गर्नसमेत निर्देशन दिनुभयो । “लेखापरीक्षणको कामलाई प्राथमिकतामा राख्नुहोला । अब यो समस्या समाधान गर्न सकिएन भनेर नेतृत्व उम्कने अवस्था रहँदैन । सबै निकायले आफ्नो जिम्मेवारी पूरा गर्नुहोला,” सञ्चारमन्त्री तिमिल्सिनाले बताउनुभयो ।
उहाँले चालु आर्थिक वर्षको पहिलो त्रैमासलाई निर्णायक अवधि भन्दै सुरुदेखिनै परिणाममुखी कार्यसम्पादन गर्नसमेत निर्देशन दिनुभएको छ । “अबको तीन महिना यसअघिको तीन महिनाजस्तो हुन हुँदैन । सरकार कुन दिशामा अघि बढिरहेको छ भन्ने स्पष्ट भइसकेको छ । चालु आर्थिक वर्षको पहिलो त्रैमासमै उत्कृष्ट नतिजा देखाउनुहोला,” सञ्चारमन्त्री तिमिल्सिनाले निर्देशन दिँदै भन्नुभयो, “आगामी वर्षभरि कस्तो प्रगति गर्न सक्छौँ भन्ने संकेत पहिलो त्रैमासिक समीक्षाबाटै देखिनेछ । त्यसैले कार्यसम्पादन सम्झौता गर्दा पनि कमजोर सूचक राखेर नभई स्पष्ट नतिजा र सुधार देखिने गरी गर्नुपर्छ । कार्यसम्पादन सम्झौता कर्मचारी र नेतृत्वलाई जिम्मेवार तथा नतिजामुखी बनाउनका लागि हो ।”
बैठकमा गत आर्थिक वर्षको वार्षिक प्रगति, विकास आयोजनाको कार्यान्वयन अवस्था, बजेट खर्च, शासकीय सुधारका कार्यक्रम, मन्त्रालय तथा मातहतका निकायले भोगिरहेका समस्या र चालु आर्थिक वर्षका प्राथमिकतामाथि विस्तृत समीक्षा गरिएको छ । रासस
