• गोलबजारका केही क्षेत्रमा सुरक्षा जोखिम बढेपछि अनिश्चितकालीन कर्फ्यु जारी ।

• साउन १४ गते दिउँसो २ बजेदेखि अर्को आदेश नभएसम्म कर्फ्यु लागू ।

• उल्लङ्घन गरे प्रचलित कानुनअनुसार कारबाही हुने प्रशासनको चेतावनी ।

जनकपुरधाम । सिरहा जिल्लाको गोलबजार नगरपालिकाका केही क्षेत्रमा सुरक्षा अवस्था बिग्रिन सक्ने सम्भावनालाई मध्यनजर गर्दै जिल्ला प्रशासन कार्यालय सिरहाले अनिश्चितकालीन कर्फ्यु आदेश जारी गरेको छ ।

प्रमुख जिल्ला अधिकारी सुरेन्द्र पौडेलद्वारा आज जारी आदेशमा पछिल्लो सुरक्षा अवस्थाको विश्लेषण, आन्दोलन तथा हुलदङ्गा भई शान्ति भङ्ग हुन सक्ने देखिएकाले जिल्ला सुरक्षा समितिको निर्णयका आधारमा स्थानीय प्रशासन ऐन, २०२८ को दफा ६(क) बमोजिम कर्फ्यु आदेश जारी गरिएको उल्लेख छ ।

आदेशअनुसार कर्फ्यु लागू हुने क्षेत्र पूर्व-पश्चिम राजमार्गको पूर्वतर्फ गोलबजार नगरपालिका-३ को कहरहा खोलादेखि पश्चिमतर्फ गोलबजारको चौर्हवा चोकसम्म तोकिएको छ । त्यसैगरी उत्तरतर्फ वडा नम्बर ६ को सैनिक चोकदेखि दक्षिणतर्फ तथा वडा नम्बर ४ स्थित राजकीय प्राविधिक बहुमुखी क्याम्पस वरपरको क्षेत्र पनि कर्फ्यु क्षेत्रमा परेको प्रशासनले जनाएको छ ।

जिल्ला प्रशासन कार्यालयले साउन १४ गते दिउँसो २ बजेदेखि अर्को आदेश नभएसम्म कर्फ्यु लागू रहने जनाएको छ । प्रशासनले आदेशको पूर्ण पालना गरी जिल्लाको शान्ति र सुरक्षा कायम गर्न सर्वसाधारणसँग सहयोगको अपिल गरेको छ ।

आदेश उल्लङ्घन गरी कुनै गतिविधि सञ्चालन गरेको पाइए प्रचलित कानुनबमोजिम कारबाही गरिने चेतावनीसमेत दिइएको छ ।

जिल्ला प्रशासन कार्यालयका अनुसार सुरक्षा निकायलाई सतर्क अवस्थामा राखिएको छ भने प्रभावित क्षेत्रमा निगरानी बढाइएको छ । स्थानीय बासिन्दालाई अत्यावश्यक कामबाहेक घरबाहिर ननिस्कन प्रशासनले आग्रह गरेको छ ।