- रिपब्लिकनको प्रभाव रहेका पाँच राज्यमा डेमोक्रेटिक उम्मेदवार अगाडि ।
- ट्रम्पप्रतिको असन्तुष्टि र महँगी चुनावका प्रमुख मुद्दा ।
- सिनेटमा बहुमतका लागि डेमोक्रेटलाई कम्तीमा चार सिट आवश्यक ।
वासिङ्टन । अमेरिकी मध्यावधि चुनावको पूर्वसन्ध्यामा डेमोक्रेटिक उम्मेदवारले रिपब्लिकनको पकड रहेका पाँच राज्यमा सिनेटको प्रतिस्पर्धामा अग्रता लिएका छन् । न्युयोर्क टाइम्स र सिएना विश्वविद्यालयले गरेको सर्वेक्षणले आयोवामा पनि कडा प्रतिस्पर्धा देखाएको छ ।
सर्वेक्षणअनुसार टेक्ससमा डेमोक्रेटिक उम्मेदवार जेम्स तालारिकोले रिपब्लिकन केन प्याक्सटनलाई ५०-४३ प्रतिशतले पछाडि पार्नुभएको छ । त्यस्तै, कन्सासमा क्रिस ह्यामिल्टनले रोजर मार्सललाई ४९-४४ प्रतिशत र मेनमा ग्राहम प्लाटनरले सुसान कोलिन्सलाई ५१-४५ प्रतिशतले पछाडि पार्नुभएको छ ।
रिपब्लिकन उम्मेदवार केन प्याक्सटनको चुनावी सभा ।
ओहायोमा सेरोड ब्राउन र अलास्कामा मेरी पेल्टोला पनि आफ्ना रिपब्लिकन प्रतिस्पर्धीभन्दा अगाडि हुनुहुन्छ । आयोवामा डेमोक्रेटिक उम्मेदवार जोश टुरेकले ४८ प्रतिशत र रिपब्लिकन उम्मेदवार एस्ले हिन्सनले ४७ प्रतिशत समर्थन पाउनुभएको छ । मिशिगनमा डेमोक्रेटिक उम्मेदवार अब्दुल एल-सायेद ५३ प्रतिशत समर्थनसहित अगाडि हुनुहुन्छ ।
राष्ट्रपति डोनाल्ड ट्रम्पप्रतिको असन्तुष्टि र बढ्दो जीवनयापन खर्च चुनावका प्रमुख मुद्दा बनेका छन् । सर्वेक्षण गरिएका सात राज्यमा ट्रम्पको कार्यसम्पादनलाई ३८ प्रतिशतले मात्र समर्थन गरेका छन् । जीवनयापन खर्चको मुद्दामा डेमोक्रेटहरूले रिपब्लिकनमाथि नौ प्रतिशत अङ्कको अग्रता लिएका छन् ।
सिनेटमा बहुमत हासिल गर्न डेमोक्रेटहरूले रिपब्लिकनका कम्तीमा चार सिट जित्नुपर्नेछ । नोभेम्बर ३ मा हुने चुनावमा प्रतिनिधिसभाका सबै ४३५ र सिनेटका ३५ सिटका लागि मतदान हुँदैछ ।
सर्वेक्षणले डेमोक्रेटहरूले सिनेटको नियन्त्रण प्राप्त गर्ने सम्भावना देखाएको छ । यद्यपि, अन्तिम नतिजा मतदाताको निर्णयमा निर्भर रहनेछ । एएनआई
