भोजपुर ।  उत्पादित अलैंचीले राम्रो मूल्य पाउन थालेपछि भोजपुरका किसान उत्साहित भएका छन् । 

यस वर्ष अलैंची प्रतिमन अर्थात ४० किलोको ९८ हजारसम्ममा कारोबार भइरहेको किसानको भनाइ छ ।  केही वर्षयता अलैंचीले निरन्तर राम्रो मूल्य पाउँदै आएकोले किसान खेती विस्तारमा झन् सक्रिय बनेका छन् । 

विगतको वर्षका तुलनामा यो क्षेत्रमा अलैंचीको उत्पादनमासमेत बृद्धि भएको अलैंची व्यावसायी महासंघक भोजपुरका  अध्यक्ष राजेश विष्टले बताउनुभयो । मुल्य बढेसँगै किसानहरु अलैची खेती विस्तारमा जुटेको उहाँले जानकारी दिनुभयो ।

कृषि ज्ञान केन्द्र भोजपुरले जिल्लामा अहिले करिब ५ सय ९७ हेक्टर क्षेत्रमा अलैंची खेती भइरहेको जनाएको छ । यहाँ प्रायः रामशाही, गोलशाही, डम्वरशाही र जिर्मले जातका अलैंचीको खेती हुने गरेको केन्द्रले जनाएको छ ।

जिल्लाको चोलन्ती, दोभाने, कुदाकाउले, साम्पाङ्ग, अन्नपूर्ण, चम्पे, खावा, छिनामखु, किमालुङ, वासिङथर्पु, तिम्मा, हेलौछा, गुप्तेश्वरलगायत स्थानमा अलैंची खेती बढी हुने गरेको छ । यी क्षेत्रका किसानले उत्पादन, भण्डारण र बजार व्यवस्थापनमा अनुभव बटुलेका कारण अलैंची प्रमुख नगदेबालीको रूपमा स्थापित हुँदै गएको छ । अलैंचीले राम्रो मूल्य पाएका कारण गाउँघरमा आर्थिक गतिविधिसमेत बढेको छ । रासस