• पेरिसमा मात्रै ८५५ जना पक्राउ, पाँच सयभन्दा बढी सुरक्षाकर्मी घाइते ।
• लिमोजको ऐतिहासिक नगरभवन आगजनीबाट ध्वस्त, सयौँ पसलमा लुटपाट ।
• महँगी, विद्यालयको अवस्था र सरकारी खर्च कटौतीविरुद्ध प्रदर्शन ।

पेरिस । फ्रान्समा शनिबार भएका देशव्यापी प्रदर्शनका क्रममा हिंसा, आगजनी र लुटपाट भएपछि एक हजार ८०० जनालाई पक्राउ गरिएको छ । प्रदर्शनका क्रममा पाँच सयभन्दा बढी प्रहरी, जन्डार्म र अग्निनियन्त्रक घाइते भएको गृहमन्त्री लरेन्ट नुनेजले आइतबार बताउनुभएको छ ।

गृहमन्त्री नुनेजका अनुसार प्रदर्शनका क्रममा भएका हिंसात्मक घटनामा संलग्न व्यक्तिहरूको पहिचान गरी कानुनी कारबाही गर्न अनुसन्धान भइरहेको छ । पेरिसमा मात्रै शनिबार ८५५ जना पक्राउ परेका थिए । तीमध्ये ५५७ जना आइतबार बिहानसम्म प्रहरी हिरासतमा रहेरहेका छन् ।

प्रदर्शनका क्रममा फ्रान्सका विभिन्न सहरमा पसल तोडफोड, लुटपाट, सवारीसाधनमा आगजनी र सार्वजनिक भवनमा आक्रमण भएका थिए । मध्य फ्रान्सको लिमोज सहरस्थित १९औँ शताब्दीमा बनेको ऐतिहासिक नगरभवनमा आगलागी हुँदा भवनको छाना र टावरसमेत ढलेको छ । लियोनमा पर्यटक सूचना केन्द्रमा आगजनी भएको थियो भने मार्सेमा प्रदर्शनकारीहरू नगरभवनभित्र प्रवेश गरेका थिए । बोर्डो र अन्य सहरमा पनि सार्वजनिक भवन तथा व्यावसायिक प्रतिष्ठानमा क्षति पुगेको छ ।

फ्रान्सको आन्तरिक मन्त्रालयका अनुसार शनिबारको प्रदर्शनमा देशभर पाँच लाख ५० हजार मानिस सहभागी भएका थिए । श्रमिक सङ्गठन सीजीटीले भने प्रदर्शनमा आठ लाख मानिस सहभागी भएको दाबी गरेको छ । अधिकांश प्रदर्शन शान्तिपूर्ण रूपमा सुरु भए पनि केही स्थानमा नकाबधारी समूह र प्रहरीबीच झडप भएपछि स्थिति हिंसात्मक बनेको थियो ।

पेरिसमा प्रदर्शनका क्रममा गाडीमा आगजनी
प्रदर्शनकारीहरूले बढ्दो महँगी, विद्यालयको कमजोर अवस्था र सरकारी बजेटमा प्रस्तावित कटौतीको विरोध गरेका थिए । केही सातादेखि जारी विद्यार्थी आन्दोलनमा श्रमिक सङ्गठन र अन्य समूहसमेत सहभागी भएपछि प्रदर्शन देशव्यापी बनेको हो । मध्यपूर्वको युद्धका कारण बढेको जीवनयापन खर्च पनि प्रदर्शनको प्रमुख मुद्दा बनेको छ । आन्दोलनलाई सन् २०१८ मा इन्धन कर वृद्धिविरुद्ध सुरु भएको ‘येलो भेस्ट’ आन्दोलनसँग समेत तुलना गरिएको छ ।

गृहमन्त्री नुनेजले सार्वजनिक भवनमा आक्रमण, प्रहरीमाथि हिंसा र पसलमा लुटपाट गर्नेहरूलाई जिम्मेवार ठहर गर्दै कारबाही गरिने बताउनुभएको छ । प्रधानमन्त्री सेबास्टियन लेकोर्नुले हिंसात्मक घटनामा अतिवामपन्थी समूह र लुटपाटमा संलग्न आपराधिक समूहको भूमिका रहेको आरोप लगाउनुभएको छ । यद्यपि, प्रदर्शनमा सहभागी सबैलाई हिंसामा संलग्न भएको रूपमा चित्रण गर्न नमिल्ने र अधिकांश प्रदर्शन शान्तिपूर्ण रहेको विवरणमा उल्लेख छ ।

पेरिसमा प्रदर्शनकारीलाई नियन्त्रणमा लिँदै प्रहरी
राष्ट्रपति इमानुएल म्याक्रोँले सार्वजनिक भवन तथा व्यावसायिक प्रतिष्ठानमा आक्रमण गर्नेहरूलाई अभियोजन गरी सजाय दिइने बताउनुभएको छ । उहाँले आइतबार साँझ राष्ट्रका नाममा सम्बोधन गर्ने कार्यक्रम रहेको एएफपीले जनाएको छ । यसैबीच, हिंसाका कारण करिब एक हजार ५०० व्यवसायमा क्षति पुगेको र आर्थिक नोक्सानी करोडौँ युरो पुग्न सक्ने व्यवसायी सङ्गठनले जनाएको छ । एएफपी