किएभ । अमेरिकी प्रतिनिधि जारेड कुश्नर र स्टिभ विट्कफले आइतबार युक्रेनी राष्ट्रपति भोलोदिमिर जेलेन्स्कीसँग रुससँगको युद्ध अन्त्य गर्ने विषयमा वार्ता गर्नुभएको छ । शनिबार रुसी राष्ट्रपति भ्लादिमिर पुटिनसँग भेट गरेपछि उहाँहरू किएभ पुग्नुभएको हो ।
ग्रीष्मकालीन तनाव बढेपछि दोस्रो विश्वयुद्धयताकै युरोपको सबैभन्दा घातक द्वन्द्व अन्त्य गर्न वार्ता पुनः सुरु गर्ने प्रयासस्वरूप अमेरिकी प्रतिनिधिहरू रुसबाट रेलमार्ग हुँदै युक्रेनी राजधानी किएभ पुगेका हुन् ।
राष्ट्रपति जेलेन्स्कीले किएभको मध्य क्षेत्रमा अमेरिकी राष्ट्रपति डोनाल्ड ट्रम्पका ज्वाइँ कुश्नर र व्यापारिक साझेदार विट्कफसँग भएको भेटको भिडियो सार्वजनिक गर्दै वार्ता सुरु भएको जानकारी दिनुभएको छ ।
विट्कफ र कुश्नर यसअघि आठ पटक मस्को पुगिसक्नुभएको थियो । तर, रुसले फेब्रुअरी २०२२ मा युक्रेनमाथि आक्रमण गरेयता उहाँहरू वार्ताका लागि पहिलोपटक किएभ पुग्नुभएको हो ।
वार्तामा युक्रेनका उच्च सुरक्षा अधिकारी र वार्ताकारका साथै केही युरोपेली देशका राष्ट्रिय सुरक्षा सल्लाहकारसमेत सहभागी थिए ।
जेलेन्स्कीले अमेरिकी प्रतिनिधिहरूलाई किएभको ऐतिहासिक सेन्ट सोफिया क्याथेड्रलको अवलोकनसमेत गराउनुभएको थियो । क्याथेड्रलनजिकै रहेको युक्रेनी सुरक्षा सेवा (एसबीयू) को भवन शुक्रबार रुसी ड्रोन प्रहारबाट क्षतिग्रस्त भएको थियो ।
रुसको आक्रमणबाट लाखौँ मानिसको मृत्यु भएको र करोडौँ नागरिक विस्थापित भएका छन् ।
विट्कफ र कुश्नरले शनिबार पुटिनसँग ‘रुस-युक्रेन युद्धमा शान्तिका लागि राष्ट्रपति ट्रम्पको एजेन्डा अगाडि बढाउने’ विषयमा भेट गरेको ह्वाइट हाउसका एक अधिकारीले एएफपीलाई उपलब्ध गराएको वक्तव्यमा उल्लेख छ ।
वक्तव्यमा दुवै पक्षले आगामी कदमका लागि ठोस योजनाबारे छलफल गरेको र ती योजनाबारे आउँदा हप्ताहरूमा जानकारी दिइने उल्लेख गरिएको छ ।
क्रेमलिनका सहायक युरि उशाकोभले वार्तालाई ‘अत्यन्तै खुला’ बताउँदै अमेरिकी पक्षले सम्झौताका सम्भावित मार्गबारे केही विचार प्रस्तुत गरेको जानकारी दिनुभयो । उहाँले भने विस्तृत विवरण दिनुभएन ।
उशाकोभका अनुसार रुसी पक्षले अमेरिकी प्रतिनिधिहरूलाई पूर्वी युक्रेनको बाँकी भाग कब्जा गर्ने आफ्नो सैन्य लक्ष्य पूरा गर्न मस्को विश्वस्त रहेको बताएको छ ।
यसैबीच, रुस र युक्रेन दुवैले अमेरिकी प्रतिनिधिहरूको भ्रमणसँग जोडेर तीन दिनसम्म एकअर्काको राजधानीमाथि आक्रमण नगर्ने प्रतिबद्धता जनाएका छन् ।
राष्ट्रपति जेलेन्स्कीले आइतबार युक्रेन वार्ताका लागि तयार रहेको बताउनुभएको छ । उहाँले सामाजिक सञ्जालमा युक्रेन सधैँ रचनात्मक रहेको र रहिरहने उल्लेख गर्नुभएको छ ।
रुसले युद्ध सुरु गरेदेखि युक्रेनको हवाई क्षेत्र बन्द छ । त्यसैले भ्रमणमा आउने विदेशी नेता तथा प्रतिनिधिहरू रेलमार्गबाट किएभ पुग्ने गरेका छन् ।
यद्यपि, धेरै युक्रेनी नागरिक शान्ति वार्ताको सफलताप्रति आशावादी देखिएका छैनन् । किएभका २९ वर्षीय यारोस्लाभले यसअघि पनि धेरै वार्ता भएकाले आफूलाई यसपटक ठूलो आशा नभएको बताउनुभयो ।
ट्रम्पलाई पुटिनको धन्यवाद
अमेरिकी प्रतिनिधिहरूसँगको वार्ताअघि टेलिभिजनमार्फत सम्बोधन गर्दै राष्ट्रपति पुटिनले किएभमा अमेरिकी प्रतिनिधिहरूको सुरक्षा सुनिश्चित गर्ने बताउनुभएको थियो ।
“वार्ता प्रक्रिया र तपाईंहरूजस्ता मध्यस्थकर्ताको सुरक्षा सुनिश्चित गर्न हामीले गर्न सक्ने सबै कुरा गर्नेछौँ,” पुटिनले विट्कफ र कुश्नरसँगको भेटमा भन्नुभएको थियो ।
शनिबारअघि पुटिनले युद्ध अन्त्य गर्न प्रयास जारी राखेकोमा अमेरिकी राष्ट्रपति ट्रम्पलाई धन्यवादसमेत दिनुभएको थियो । उहाँले युद्ध अन्त्यको प्रयास सजिलो नभए पनि जारी रहेको बताउनुभएको थियो ।
ट्रम्पले शुक्रबार आफ्ना प्रतिनिधिहरू युद्ध अन्त्य गर्ने ‘प्रस्ताव’ लिएर गएको बताउनुभएको थियो । “हामीसँग शान्तिका लागि एउटा विचार छ,” उहाँले विस्तृत जानकारी नदिई भन्नुभएको थियो ।
अमेरिकी प्रयासहरूले अहिलेसम्म युद्ध अन्त्यमा ठोस सफलता दिलाउन सकेका छैनन् । रुसले पूर्वी र दक्षिणी युक्रेनका ठूला भूभाग नियन्त्रणमा राखेको छ भने राष्ट्रपति पुटिनले पूर्वी युक्रेनको बाँकी भाग कब्जा गर्ने लक्ष्यमा मस्को दृढ रहेको बताउँदै आउनुभएको छ । एएफपी
