- बैंककमा भीषण बाढी, करिब ४ हजार ९ सय मानिस सुरक्षित स्थानमा सारिए ।
- ५२ हजारभन्दा बढी घरपरिवार प्रभावित, सयौँ विद्यालय बन्द हुने ।
- बैंककका केही क्षेत्रमा ३३० मिलिमिटरभन्दा बढी वर्षा ।
बैंकक । लगातारको भारी वर्षापछि थाइल्यान्डको राजधानी बैंककमा भीषण बाढी आएको छ । बाढीका कारण हजारौँ मानिस आश्रयस्थलमा बस्न बाध्य भएका छन् भने घर तथा सडक जलमग्न भएका छन् ।
बैंकक महानगर प्रशासनका अनुसार करिब चार हजार नौ सय जनालाई सुरक्षित स्थानमा सारिएको छ भने ५२ हजारभन्दा बढी घरपरिवार बाढीबाट प्रभावित भएका छन् । बाढीपछि राजधानीका विभिन्न क्षेत्रमा विपद् घोषणा गरिएको छ ।
मौसम विभागका अनुसार बिहीबारदेखि आइतबारसम्म बैंककका केही क्षेत्रमा ३३० मिलिमिटरभन्दा बढी वर्षा भएको छ । सेप्टेम्बर थाइल्यान्डमा वर्षायामको उच्च अवधि भए पनि स्थानीय बासिन्दाले यसपटकको बाढी विगतका वर्षको तुलनामा गम्भीर रहेको बताएका छन् ।
बैंककको बाहिरी क्षेत्रमा प्रेमप्रचाकोर्न नहरनजिक बस्ने ४४ वर्षीय कार्यालय कर्मचारी कोसिन निलसेटका अनुसार उहाँको घर करिब ३० घण्टासम्म पानीमा डुबेको थियो । उहाँले यसपटक पानीको सतह सन् २०११ को विनाशकारी बाढीभन्दा पनि माथि पुगेको बताउनुभयो ।
सन् २०११ मा थाइल्यान्डमा आएको व्यापक बाढीका कारण ५०० भन्दा बढी मानिसको मृत्यु भएको थियो भने लाखौँ घरमा क्षति पुगेको थियो ।
बैंककका विभिन्न क्षेत्रमा मानिसहरू घुँडासम्म आउने फोहोर पानीमा हिँडिरहेका देखिएका छन् । केहीले प्लास्टिकका टबमा आफ्ना सामान राखेर बाढीको पानीबाट सुरक्षित स्थानतर्फ लगेका छन् ।
आश्रयस्थलमा कठिन अवस्था
बैंककका नहरमा पानीको सतह अझै उच्च रहेको र पानी निकास तीव्र बनाउन अधिकारीहरूले काम गरिरहेको महानगर प्रशासनले जनाएको छ । आइतबार पनि थप वर्षाको सम्भावना रहे पनि सोमबारदेखि वर्षा क्रमशः कम हुने अनुमान गरिएको छ ।
बैंककका गभर्नर चाडचार्ट सिटिपुन्टले बाढी प्रभावित क्षेत्रका बासिन्दालाई अत्यावश्यक कामबाहेक यात्रा नगर्न आग्रह गर्नुभएको छ । उहाँले शनिबार राति खेहा रोङ्क्लाओ क्षेत्रको अस्थायी आश्रयस्थलको निरीक्षण गर्नुभएको थियो । त्यहाँ करिब एक हजार जना विस्थापित भएको बताइएको छ ।
आश्रयस्थलमा केही मानिस खाट र बेन्चमा आफ्ना कुकुरसहित बसेका थिए भने अन्यले कक्षाकोठाको भुइँमा कम्बल ओछ्याएर रात बिताएका थिए । बाढीका कारण बैंककका सयौँ विद्यालय सोमबार बन्द हुने महानगर प्रशासनले जनाएको छ ।
बाढीका कारण केही पसलमा अत्यावश्यक सामग्रीको अभावसमेत देखिएको छ । मानिसहरूले आवश्यक सामग्री किन्न हतार गरेपछि केही सुविधा पसलका र्याक खाली भएका थिए ।
प्रधानमन्त्री कार्यालयले भने सर्वसाधारणलाई आत्तिएर अत्यधिक सामान नकिन्न आग्रह गर्दै कृत्रिम रूपमा मूल्य बढाउनु कानुनविपरीत हुने चेतावनी दिएको छ ।
प्रेमप्रचाकोर्न नहरनजिकै बस्ने ५६ वर्षीया थिदारत सिल्सुवानको घर पनि आंशिक रूपमा डुबेको छ । उहाँले दुई दिनदेखि टेबलमाथि सुतिरहेको बताउनुभयो । आश्रयस्थल जानुभन्दा आफ्ना सामान जोगाउने र घर सफा गर्ने प्रयासमा रहेको उहाँले बताउनुभयो ।
उहाँले ठूला विद्युतीय उपकरण फ्रिज र लुगा धुने मेसिन बचाउन नसकेको र ती बिग्रिएको हुन सक्ने बताउनुभयो ।
वैज्ञानिकहरूले विश्वव्यापी तापक्रम वृद्धि र जीवाश्म इन्धनबाट हुने उत्सर्जनका कारण अत्यधिक मौसमजन्य घटनाको तीव्रता र आवृत्ति बढ्न सक्ने चेतावनी दिँदै आएका छन् । एएफपी
