• सी-ट्रम्पबीच बिहीबार भेटवार्ता हुने ।
• व्यापार, प्रविधि र एआई मुख्य एजेन्डा ।
• ताइवानसहित आपूर्ति शृङ्खलाबारे पनि छलफल हुने ।

बेइजिङ । चीनका राष्ट्रपति सी चिनफिङ यसै साता अमेरिकी राष्ट्रपति डोनाल्ड ट्रम्पसँग भेटवार्ता गर्न अमेरिका भ्रमणमा जानुहुने बेइजिङले सोमबार पुष्टि गरेको छ । सरकारी विज्ञप्तिअनुसार राष्ट्रपति सी बुधबार अमेरिका पुगेर शुक्रबारसम्म त्यहाँ रहनुहुनेछ ।

अमेरिकी अधिकारीका अनुसार राष्ट्रपति ट्रम्पले बुधबार जोइन्ट बेस एन्ड्र्युजमा राष्ट्रपति सीलाई स्वागत गर्नुहुनेछ । त्यसको भोलिपल्ट दुई नेताबीच भेटवार्ता हुनेछ । राष्ट्रपति ट्रम्पले आइतबार पत्रकारसँग आफूले सीसँग ‘लगभग सबै विषयमा’ छलफल गर्ने बताउनुभएको थियो ।

विश्वका दुई ठूला अर्थतन्त्रबीच जारी व्यापार तनाव भेटवार्ताको प्रमुख विषय बन्ने अपेक्षा गरिएको छ । दुवै पक्षले करिब एक वर्षदेखि व्यापार युद्धमा अस्थायी युद्धविराम कायम राखे पनि स्थायी सम्झौता हुन सकेको छैन । व्यापारसँगै प्रविधि, कृत्रिम बौद्धिकता (एआई) र आपूर्ति शृङ्खलाका विषयमा पनि छलफल हुने बताइएको छ ।

यसैबीच, चीनका उपप्रधानमन्त्री तथा व्यापारसम्बन्धी प्रमुख वार्ताकार हे लिफेङ अमेरिकी अर्थमन्त्री स्कट बेसेन्टसँग वार्ता गर्न अमेरिकामै हुनुहुन्छ । उहाँहरूबीच आइतबार भएको वार्तामा एआईसम्बन्धी विषयमा सञ्चार संयन्त्र स्थापना गर्नेबारे छलफल भएको अमेरिकी पक्षले जनाएको छ ।

व्यापार र प्रविधिसँगै ताइवानसम्बन्धी विषयमा पनि दुई नेताबीच विचार आदानप्रदान हुने अपेक्षा गरिएको छ । राष्ट्रपति ट्रम्पको इरानसँगको युद्ध तथा चीन-इरान सम्बन्धले पनि अमेरिका-चीन सम्बन्धमा थप जटिलता ल्याएको छ । विभिन्न विषयमा मतभेद रहे पनि शीर्ष नेतृत्वको प्रत्यक्ष संवादमार्फत तनाव व्यवस्थापन गर्ने प्रयास दुवै पक्षबाट भइरहेको छ ।एएफपी