- संसदीय निर्वाचनको अन्तिम दिन मतदान जारी ।
- युनाइटेड रसियालाई पुनः बहुमतको अपेक्षा ।
- ड्रोन आक्रमण र साइबर हमलाबीच मतदान ।
मस्को । युक्रेन युद्ध पाँचौँ वर्षमा प्रवेश गरिरहेका बेला रुसमा संसदीय निर्वाचनको तेस्रो तथा अन्तिम दिन आइतबार मतदान हुँदैछ । निर्वाचनले क्रेमलिनको सत्तामाथिको पकड र युद्धप्रति रुसी जनमतको केही सङ्केत दिने अपेक्षा गरिएको छ ।
राष्ट्रपति भ्लादिमिर पुटिनलाई समर्थन गर्ने सत्तारुढ ‘युनाइटेड रसिया’ पार्टीले यसपटक पनि बहुमत हासिल गर्ने अपेक्षा गरिएको छ । सन् २००३ यता भएका सबै संसदीय निर्वाचनमा उक्त पार्टी विजयी हुँदै आएको छ ।
निर्वाचनअघि रुसको सर्वोच्च अदालतले युद्धविरोधी ‘याब्लोको’ पार्टीलाई सङ्घीय सूचीमार्फत चुनावमा प्रतिस्पर्धा गर्न रोक लगाएको थियो । यद्यपि, उक्त पार्टीका केही उम्मेदवार एकल निर्वाचन क्षेत्रमा प्रतिस्पर्धा गरिरहेका छन् । चुनावमा सहभागी अन्य प्रमुख दलहरूले पुटिन र युक्रेनमा जारी सैन्य कारबाहीलाई समर्थन गर्छन् ।
सन् २०२२ मा युक्रेनमा सैन्य कारबाही सुरु भएपछि रुसमा भएको यो पहिलो संसदीय निर्वाचन हो । पुटिनले रुसी नागरिकलाई मतदानमा सहभागी हुन आग्रह गर्दै मतदानलाई रुसी सेनाप्रतिको समर्थन र देशलाई कमजोर पार्न खोज्नेहरूलाई दिइने जवाफका रूपमा प्रस्तुत गर्नुभएको छ ।
मस्कोका मेयर सर्गेई सोब्यानिनले मतदानको अन्तिम दिन सुरु हुनुअघि रुसी हवाई प्रतिरक्षा प्रणालीले एक हजार ६०० भन्दा बढी ड्रोन खसालेको बताउनुभएको छ । तीमध्ये करिब ४५० ड्रोन मस्कोतर्फ अघि बढिरहेका उहाँको दाबी छ । उहाँले आक्रमण निर्वाचनमा अवरोध पुर्याउने उद्देश्यले गरिएको बताउनुभएको छ ।
रुसको तल्लो सदन ‘स्टेट डुमा’का ४५० सिटका लागि भइरहेको मतदान आइतबार १८ः०० जीएमटीसम्म जारी रहनेछ ।
यसैबीच, रुसकी केन्द्रीय निर्वाचन आयोगकी अध्यक्ष एला पामफिलोभाले मस्कोको विद्युतीय मतदान प्रणालीमाथि ‘शक्तिशाली’ साइबर आक्रमण भएको बताउनुभएको छ । उहाँका अनुसार आक्रमणकारीले सुदूरपूर्वी क्षेत्रमा सञ्चार सम्पर्क अवरुद्ध गर्ने प्रयास गरेका थिए ।
केन्द्रीय निर्वाचन आयोगका अनुसार शनिबार साँझसम्म करिब ४० प्रतिशत मतदान भएको थियो । निर्वाचनका क्रममा सम्भावित सैन्य परिचालनबारे समेत चर्चा भए पनि पुटिनले तत्काल त्यस्तो कुनै योजना नरहेको बताउनुभएको छ । एएफपी
