•  बेइजिङमा अजित डोभाल र चिनियाँ उपराष्ट्रपति हान झेङबीच सम्बन्ध सुधारबारे छलफल ।

•  सीमा क्षेत्रमा शान्ति, स्थिरता र सहकार्य बढाउन २५औँ चरणको वार्ता हुँदै ।

•  लामो समयदेखिको सीमा विवाद र तनाव कम गर्दै सम्बन्ध सामान्य बनाउने सहमति ।

बेइजिङ । भारत र चीनले सीमा क्षेत्रमा शान्ति तथा स्थिरता कायम गर्दै द्विपक्षीय सम्बन्ध सुधार गर्ने उपायबारे छलफल गरेका छन् । दुई दिने चीन भ्रमणमा रहनुभएका भारतका राष्ट्रिय सुरक्षा सल्लाहकार अजित डोभालले मङ्गलबार चिनियाँ उपराष्ट्रपति हान झेङसँग भेटवार्ता गर्नुभएको हो ।

भारत-चीन सीमा प्रश्नसम्बन्धी विशेष प्रतिनिधिको २५औँ चरणको वार्ताअघि भएको भेटमा सीमा क्षेत्रमा शान्ति र स्थिरता सुदृढ गर्ने तथा आर्थिक, राजनीतिक र बहुपक्षीय क्षेत्रमा सहकार्य बढाउने विषयमा छलफल भएको चीनस्थित भारतीय दूतावासले जनाएको छ ।

भारतीय विदेश मन्त्रालयका प्रवक्ता रणधीर जयसवालले दुवै पक्षले पछिल्लो घटना क्रमको समीक्षा गर्दै सम्बन्धलाई क्रमशः सामान्य बनाउने दिशामा प्रगति भइरहेको बताउनुभयो । उहाँका अनुसार स्थिर, पूर्वानुमानयोग्य र रचनात्मक सम्बन्धले दुई देशबिच विश्वास र समझदारी बढाउन सहयोग गर्नेछ । डोभाल र चिनियाँ विदेशमन्त्री वाङ यीबिच पनि २५औँ चरणको विशेष प्रतिनिधि वार्ता हुँदैछ । 

गत जुनमा नयाँदिल्लीमा भएको ब्रिक्स राष्ट्रिय सुरक्षा सल्लाहकारको बैठकका क्रममा डोभाल र वाङबिच भेटवार्ता भएको थियो । भारत-चीन सम्बन्ध सुधारको प्रयासका क्रममा गत वर्ष तियानजिनमा भएको एससीओ शिखर सम्मेलनमा भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबिच भेटवार्ता भएको थियो । 

दुवै नेताले दुई देश विकासका साझेदार रहेको र मतभेदलाई विवादमा परिणत हुन दिन नहुनेमा जोड दिनुभएको थियो । सीमा विवादका कारण लामो समयदेखि तनावपूर्ण रहेको भारत-चीन सम्बन्धलाई उच्चस्तरीय संवादमार्फत क्रमशः सामान्य बनाउने प्रयास भइरहेको छ । एएनआई