• भेरी-२ रिसाङमा पहिरोमा परी चार जनाको मृत्यु ।
• दुई जना बेपत्ता, घाइतेमध्ये दुईको अवस्था गम्भीर ।
• २०० भन्दा बढीलाई सुरक्षित स्थानमा सारियो ।

रे समाचार/जाजरकोट । अविरल वर्षापछि भेरी नगरपालिका-२ रिसाङमा गएको पहिरोमा परी मृत्यु हुनेको संख्या चार पुगेको छ । शनिबार बेलुकी पहिरोमा पुरिएर बेपत्ता भएकामध्ये तीन जनाको शव फेला परेसँगै मृतकको संख्या चार पुगेको हो ।

पहिरोमा परी भेरी-२ का ७० वर्षीय भीमबहादुर कार्की, ८७ वर्षीया रती खत्री र उहाँका ५४ वर्षीय छोरा उमासिंह खत्रीको मृत्यु भएको छ । पहिरोमा घाइते भएका ५२ वर्षीय केदार कार्कीको उपचारका क्रममा मेडिकल कलेज कोहलपुरमा मृत्यु भएको हो ।

भेरी-२ चिसापानीका भीमबहादुर कार्की र गैरीगाउँका १४ वर्षीय हरिस विक अझै बेपत्ता छन् । उनीहरूको खोजीका लागि नेपाली सेना, नेपाल प्रहरी र सशस्त्र प्रहरीको संयुक्त टोली परिचालन गरिएको छ ।

पहिरोमा परी सात जना घाइते भएका छन् । घाइतेमध्ये ६२ वर्षीय रामबहादुर शाही र ६१ वर्षीया भद्रकला कार्कीको अवस्था गम्भीर रहेको छ । उनीहरूलाई प्रारम्भिक उपचारपछि थप उपचारका लागि नेपालगञ्ज र कोहलपुर पठाइएको छ । अन्य घाइतेमध्ये केहीको उपचार स्थानीय तथा जिल्ला अस्पतालमा भइरहेको छ भने तीन जना उपचारपछि डिस्चार्ज भएका छन् ।

३० साउन दिउँसोदेखि परेको अविरल वर्षाका कारण भेरी-२ रिसाङलगायत आसपासका क्षेत्रमा पहिरो गएको हो । पहिरोले घर तथा टहरामा क्षति पुर्‍याएको छ भने सडक तथा पैदलमार्ग अवरुद्ध हुँदा उद्धार तथा खोजीमा कठिनाइ भएको छ ।

पहिरोको जोखिममा रहेका भेरी-२ रिसाङलगायत क्षेत्रका २०० भन्दा बढी स्थानीयवासीलाई सुरक्षित स्थानमा सारिएको छ । उनीहरूलाई त्रिभुवन आधारभूत विद्यालयलगायत सुरक्षित स्थानमा राखिएको प्रहरीले जनाएको छ ।

अविरल वर्षा जारी रहेकाले प्रभावित क्षेत्रमा थप पहिरोको जोखिम कायमै रहेको छ । सुरक्षाकर्मी तथा स्थानीय तहले जोखिमयुक्त क्षेत्रमा नबस्न र सुरक्षित स्थानमा रहन स्थानीयवासीलाई आग्रह गरेका छन् ।