-1786787930.png)
- बस दुर्घटनामा दुई जना तीर्थयात्रीको मृत्यु ।
- तीन जना घाइतेको काठमाडौँमा उपचार ।
- चालक प्रहरी नियन्त्रणमा ।
रे समाचार/नुवाकोट । नुवाकोटको टोखा-छहरे सडकखण्डअन्तर्गत शिवपुरी गाउँपालिका-७ थानाभञ्ज्याङमा रोकिराखेको बस आफैँ गुडेर दुर्घटना हुँदा दुई जना तीर्थयात्रीको मृत्यु भएको छ । दुर्घटनामा तीन जना घाइते भएका छन् ।
दुप्चेश्वर महादेवको दर्शनका लागि काठमाडौँबाट तीर्थयात्री लिएर आएको बा.प्र.०८-००१ ख ००५२ नम्बरको बस सडकछेउमा रोकिराखेको अवस्थामा आफैँ गुडेर दुर्घटनामा परेको जिल्ला ट्राफिक प्रहरी कार्यालय नुवाकोटले जनाएको छ ।
बस रोकेर चालक र यात्रुहरू खाजा खान गएको समयमा आफैँ गुडेको बसले अगाडि रोकिराखेको बा.प्र.०३-००१ ज ११७६ नम्बरको विद्युतीय भ्यानलाई समेत ठक्कर दिएको थियो । ठक्करपछि बस र भ्यान सडकबाट करिब ५० मिटर तल खसेका थिए ।
दुर्घटनामा काभ्रेको बनेपा नगरपालिका-८ की ५४ वर्षीया कृष्णमाया प्रजापती (डङ्गोल) र रामेछापको खाँडादेवी गाउँपालिका-२ की ६५ वर्षीया उदयमाया खत्रीको मृत्यु भएको प्रहरीले जनाएको छ । घाइते अवस्थामा उद्धार गरी काठमाडौँ पठाइएका उनीहरूको अस्पताल पुर्याएलगत्तै मृत्यु भएको हो ।
दुर्घटनामा सर्लाहीको लालबन्दी नगरपालिका-९ की २५ वर्षीया सुजता पोखरेल, काभ्रेको बनेपा नगरपालिका-१० की ४२ वर्षीया शर्मिला श्रेष्ठ र दोलखाको मेलुङ गाउँपालिका-६ की ६० वर्षीया ज्ञानु श्रेष्ठ घाइते भएका छन् । उनीहरूको काठमाडौँमा उपचार भइरहेको छ ।
दुर्घटनापछि बस चालक काभ्रेको पाँचखाल नगरपालिका-७ का सीताराम आचार्यलाई प्रहरीले नियन्त्रणमा लिएको छ ।
-1786866081.png)
