- आफू निर्वाचित राष्ट्रपति भएको बोल्सोनारोको दाबी ।
- अमेरिकाबाटै विपक्षीको नेतृत्व गर्ने घोषणा ।
- भ्रष्टाचार र सम्पत्ति शुद्धीकरणको अनुसन्धान जारी ।
ब्रासिलिया । ब्राजिलका दक्षिणपन्थी नेता फ्लेभियो बोल्सोनारोले अमेरिका पुगेपछि आफू निर्वाचित राष्ट्रपति भएको दाबी गर्नुभएको छ । उहाँले ब्राजिलको निर्वाचनमा धाँधली भएको आरोप लगाउँदै अमेरिकाबाटै विपक्षीको नेतृत्व गर्ने बताउनुभएको छ । यसअघि वर्तमान राष्ट्रपति लुइज इनासियो लुला दा सिल्भाले दोस्रो चरणको निर्वाचनमा विजय हासिल गर्नुभएको थियो ।
पैँतालीस वर्षीय बोल्सोनारो बुधबार निजी विमानबाट मियामी नजिकै पुग्नुभएको थियो । अमेरिकी राष्ट्रपति डोनाल्ड ट्रम्पले ब्राजिलको निर्वाचन प्रक्रिया असामान्य भएको धारणा दोहोर्याउनुभएको छ । यद्यपि, बोल्सोनारोको राष्ट्रपति पदसम्बन्धी दाबीमा आफू संलग्न नहुने उहाँले बताउनुभएको छ ।
फ्लेभियो बोल्सोनारो मियामीस्थित ओपा-लोका विमानस्थलमा २८ अक्टोबर २०२६ का दिन निजी विमानबाट ओर्लँदै ।
फ्लेभियोका पिता तथा पूर्वराष्ट्रपति जाइर बोल्सोनारो सन् २०२२ को निर्वाचनमा लुलासँग पराजित हुनुभएको थियो । त्यसपछि निर्वाचनको परिणाम उल्ट्याउने उहाँको प्रयास असफल भएको थियो । उहाँ अहिले घरमै नजरबन्दमा हुनुहुन्छ ।
फ्लेभियोले भ्रष्टाचार र सम्पत्ति शुद्धीकरणसम्बन्धी अनुसन्धानको सामना गरिरहनुभएको छ । संसदीय संरक्षणको अवधि सकिन लाग्दा उहाँलाई राहदानी बुझाउन निर्देशन दिइएको थियो । तर, उहाँ अर्जेन्टिना र इक्वेडर हुँदै अमेरिका पुग्नुभएको बताइएको छ ।
अमेरिकी गृह सुरक्षा विभागले उहाँका परिवारका सदस्यहरूले आवश्यक जाँचपछि आप्रवासन कानूनअनुसार अमेरिका प्रवेशको अनुमति पाएको जनाएको छ ।
ब्राजिलका राष्ट्रपति लुलाले बोल्सोनारोको देश छाड्ने निर्णयलाई ‘लाजमर्दो’ बताउनुभएको छ । देश छाडेर जाने व्यक्तिसँग लुकाउनुपर्ने केही कुरा हुन सक्ने उहाँको टिप्पणी थियो । यद्यपि, ब्राजिलका कानून कार्यान्वयन अधिकारीहरूले बुधबार बोल्सोनारोलाई औपचारिक रूपमा फरार घोषणा नगरिएको स्पष्ट पारेका छन् । एएनआई
