• निदाल हसनको मृत्युदण्ड प्रत्यक्ष प्रसारण नहुने ।
• योजनाको अमेरिका र विदेशमा व्यापक विरोध भएको थियो ।
• सन् १९४५ पछि अमेरिकी सेनाको फायरिङ स्क्वाडबाट पहिलो मृत्युदण्ड हुने ।

वासिङ्टन । अमेरिकी राष्ट्रपति डोनाल्ड ट्रम्पले सैन्य आधारमा गोली हानेर दिइने मृत्युदण्डको प्रत्यक्ष प्रसारण गर्ने योजना रद्द गर्नुभएको छ । रक्षामन्त्री पीट हेगसेथको विवादास्पद योजना व्यापक आलोचनापछि रद्द गरिएको हो ।

निदाल हसनलाई दिइने मृत्युदण्ड प्रत्यक्ष प्रसारण गर्ने योजनाको अमेरिका तथा विदेशमा व्यापक विरोध भएको थियो । अमेरिकी डेमोक्रेटिक र रिपब्लिकन राजनीतिज्ञ, क्याथोलिक चर्च, अधिकार समूह र संयुक्त राष्ट्रसङ्घले यसप्रति आक्रोश व्यक्त गरेका थिए ।

यो निर्णय रक्षामन्त्री हेगसेथका लागि ठूलो झट्का भएको छ । उहाँ इरान युद्धमा देखिएको गतिरोध र त्यसका असरका कारण पनि आलोचनामा हुनुहुन्छ । यसले आगामी मध्यावधि निर्वाचनमा रिपब्लिकन पार्टीको सम्भावनामा असर पार्न सक्ने आकलन गरिएको छ ।

ट्रम्पले बिहीबार आफ्नो ट्रुथ सोसल प्लेटफर्ममा लेख्दै हसनलाई निर्धारित समयमा फायरिङ स्क्वाडबाट मृत्युदण्ड दिइने तर त्यसको प्रत्यक्ष प्रसारण नगरिने बताउनुभएको छ ।

अमेरिकी राष्ट्रपतिले प्रत्यक्ष प्रसारण गर्ने योजनाको व्यक्तिगत रूपमा विरोध नगरेको सङ्केत पनि दिनुभएको छ । उहाँले यसबाट अमेरिकाले आतङ्कवादी र हसनजस्ता व्यक्तिसँग कसरी व्यवहार गर्छ भन्ने संसारलाई देखाउन सकिने बताउनुभएको छ ।

तर, धेरै राम्रा र असल नियत भएका मानिस हसनको मृत्यु हेर्न नचाहने ट्रम्पले उल्लेख गर्नुभएको छ । उहाँले पीडितका नजिकका परिवारका सदस्यले चाहेमा प्रत्यक्ष रूपमा मृत्युदण्ड हेर्न सक्ने पनि बताउनुभएको छ ।

सन् २००९ मा टेक्सासको फोर्ट हुडमा १३ जनालाई गोली हानेका हसनको मृत्युदण्ड डिसेम्बर ३ का लागि निर्धारित गरिएको छ । सन् १९४५ पछि अमेरिकी सेनाको फायरिङ स्क्वाडबाट दिइने यो पहिलो मृत्युदण्ड हुने जनाइएको छ ।

रक्षामन्त्री हेगसेथले गत साता मृत्युदण्डको प्रत्यक्ष प्रसारण गर्ने योजना पुष्टि गर्दै मानिसहरूले हेर्न सक्ने र घटना सार्वजनिक गरिने बताउनुभएको थियो । एएफपी