• इमरान खानको रिहाइ माग्दै पाँच हजारभन्दा बढी समर्थकको इस्लामावादतर्फ मार्च ।
• सरकारसँगको वार्ता निष्कर्षविहीन भएपछि समर्थक राजधानीतर्फ अघि बढे ।
• इमरानलाई अस्पताल सार्न र परिवारसँग भेट्न दिन प्रदर्शनकारीको माग ।

इस्लामावाद । पाकिस्तानका पूर्वप्रधानमन्त्री इमरान खानको रिहाइको माग गर्दै उहाँका पाँच हजारभन्दा बढी समर्थकले आइतबार खैबर पख्तुनख्वाबाट राजधानी इस्लामावादतर्फ मार्च सुरु गरेका छन् ।

सरकार र खानको पाकिस्तान तहरीक-ए-इन्साफ (पिटिआई) पार्टीबीच मार्च स्थगित गर्ने विषयमा भएको वार्ता निष्कर्षविहीन भएपछि समर्थकहरू राजधानीतर्फ अघि बढेका हुन् ।

भ्रष्टाचारलगायतका अभियोगमा सन् २०२३ देखि जेलमा रहनुभएका खान र उहाँको पार्टीले ती अभियोग राजनीतिक रूपमा प्रेरित भएको बताउँदै आएका छन् । कारावासमा रहे पनि खानले ठूलो जनसमर्थन कायम राख्नुभएको छ ।

पिटिआई समर्थकहरू ट्रक, बस र कारमा लक्की मारवत जिल्लाबाट राजधानीतर्फ अघि बढेका छन् । मार्चको नेतृत्व खैबर पख्तुनख्वाका मुख्यमन्त्री तथा खानका समर्थक सोहेल अफ्रिदीले गर्नुभएको छ ।

अधिकारीहरूले इस्लामावाद प्रवेश गर्ने मुख्य मार्ग तथा सहरभित्र कन्टेनर राखेर सडक अवरुद्ध गरेका छन् ।

पिटिआई अध्यक्ष गौहर खानले दुई चरणको वार्तापछि छलफल ठप्प भएको बताउनुभएको छ । गृहमन्त्री मोहसिन नकवीले वार्ता असफल हुनुमा अफ्रिदीलाई जिम्मेवार ठहराउँदै मार्चका क्रममा मानवीय क्षति भए उहाँ नै जिम्मेवार हुने चेतावनी दिनुभएको छ ।

सरकारले उत्तरपश्चिमी क्षेत्रमा पाकिस्तानी तालिबानका आतङ्कवादी आक्रमण बढिरहेकाले मार्च स्थगित गर्न आग्रह गरेको छ । प्रदर्शनकारीहरूले खानको रिहाइसँगै उहाँलाई अस्पतालमा स्थानान्तरण गर्न र परिवारसँग भेट्न दिन माग गरेका छन् । अधिकारीहरूले भने उहाँको स्वास्थ्य राम्रो रहेको र नियमित पारिवारिक भेटघाट भइरहेको बताएका छन् ।

खानलाई अप्रिल २०२२ मा संसदीय अविश्वास प्रस्तावमार्फत प्रधानमन्त्री पदबाट हटाइएको थियो । फेब्रुअरी २०२४ को निर्वाचनपछि शाहबाज सरिफ पुनः प्रधानमन्त्री बन्नुभएको हो । उक्त निर्वाचनमा धाँधली भएको खानको पार्टीको आरोप सरकारले अस्वीकार गर्दै आएको छ । एपी