• लुला र बोल्सोनारोबीच मुख्य प्रतिस्पर्धा ।
• करिब १५ करोड ९० लाख मतदाता मतदान गर्दै ।
• बहुमत नपुगे अक्टोबर २५ मा दोस्रो चरण हुने ।

साओ पाउलो । ब्राजिलमा आइतबार हुने राष्ट्रपति निर्वाचनमा बहालवाला राष्ट्रपति लुइज इनासियो लुला दा सिल्भा र सिनेटर फ्लाभियो बोल्सोनारोबीच मुख्य प्रतिस्पर्धा हुँदैछ । वैचारिक रूपमा विपरीत ध्रुवमा रहेका यी दुई उम्मेदवारबीचको प्रतिस्पर्धालाई हालैका वर्षमा ब्राजिलकै महत्वपूर्ण राजनीतिक भिडन्तका रूपमा हेरिएको छ ।

कुनै उम्मेदवारले ५० प्रतिशतभन्दा बढी मत प्राप्त गर्न नसकेमा सर्वाधिक मत ल्याउने दुई उम्मेदवारबीच अक्टोबर २५ मा दोस्रो चरणको निर्वाचन हुनेछ । अन्य १० उम्मेदवार चुनावी मैदानमा रहे पनि उनीहरूले सीमित मत पाउने अनुमान गरिएको छ ।

८० वर्षीय लुला सातौँ पटक राष्ट्रपति पदका लागि चुनाव लडिरहनुभएको छ । उहाँ चौथो पटक राष्ट्रपति बन्ने प्रयासमा हुनुहुन्छ । ४५ वर्षीय फ्लाभियो बोल्सोनारो पूर्वराष्ट्रपति जायर बोल्सोनारोका छोरा तथा अमेरिकी राष्ट्रपति डोनाल्ड ट्रम्पका निकट सहयोगी मानिनुहुन्छ ।

करिब १५ करोड ९० लाख मतदाता रहेको यस निर्वाचनलाई ब्राजिलको आगामी आर्थिक तथा कूटनीतिक दिशाका लागि महत्वपूर्ण मानिएको छ ।

बोल्सोनारोले ट्रम्पसँगको वैचारिक निकटतालाई चुनावी अभियानको प्रमुख आधार बनाउनुभएको छ । दुर्लभ खनिजलगायत रणनीतिक क्षेत्रमा अमेरिकी प्रशासनसँग अझ राम्रो सम्झौता गर्नुपर्ने उहाँको धारणा छ । साथै, सत्तापलटको प्रयाससम्बन्धी मुद्दामा २७ वर्षको जेल सजाय भोगिरहेका आफ्ना पिता जायर बोल्सोनारोलाई रिहा गराएर राजनीतिमा फर्काउने प्रतिबद्धता पनि उहाँले जनाउनुभएको छ ।

यता, लुलाले अमेरिकाले ब्राजिलको आन्तरिक राजनीतिमा हस्तक्षेप गर्न सक्ने जोखिमबारे चेतावनी दिँदै आउनुभएको छ । ट्रम्प प्रशासनले ब्राजिलको निर्यातमा उच्च भन्सार शुल्क लगाएपछि, वासिङ्टनस्थित ब्राजिलका राजदूतको भिसा रद्द गरेपछि तथा जायर बोल्सोनारोमाथिको अनुसन्धानसँग सम्बन्धित सर्वोच्च अदालतका न्यायाधीशमाथि प्रतिबन्ध लगाएपछि लुलाले यस्तो धारणा व्यक्त गर्नुभएको हो ।

आइतबारको मतदानमा राष्ट्रपतिसँगै २७ राज्यका गभर्नर, राज्य विधायिकाका सदस्य, सङ्घीय कङ्ग्रेसका ५१३ सदस्य तथा ८१ सदस्यीय सिनेटका ५४ सदस्य पनि निर्वाचित हुनेछन् ।

राजनीतिक विश्लेषक थोमस ट्राउम्यानका अनुसार निर्वाचनको अन्तिम समयमा उम्मेदवार वा उनीहरूका सहयोगीबाट हुने कुनै पनि गल्तीले अनिर्णीत मतदाताको निर्णय प्रभावित गर्न सक्छ । ब्राजिलमा बढ्दो राजनीतिक ध्रुवीकरणका कारण निर्वाचन नीतिगत बहसभन्दा आरोप-प्रत्यारोपमा बढी केन्द्रित भएको उहाँको विश्लेषण छ ।

चार वर्षअघि लुलाले जायर बोल्सोनारोलाई करिब २१ लाख मतको झिनो अन्तरले पराजित गर्नुभएको थियो । त्यसयता महँगी, भ्रष्टाचार र राजनीतिक विवादका कारण मतदाताको धारणा परिवर्तन भएको विश्लेषण गरिएको छ ।

साओ पाउलोस्थित इन्स्पर विश्वविद्यालयका राजनीतिशास्त्रका प्राध्यापक कार्लोस मेलोजका अनुसार लुलाको उमेर र लामो राजनीतिक यात्राप्रति केही मतदाता असन्तुष्ट देखिए पनि उहाँ अझै बलियो प्रतिस्पर्धी हुनुहुन्छ । अर्कोतर्फ, भ्रष्टाचारसम्बन्धी आरोप र धार्मिक समूहहरूको आलोचनाले बोल्सोनारोलाई चुनौती थपेको छ ।

त्यसैले यसपटकको राष्ट्रपति निर्वाचन निकै प्रतिस्पर्धात्मक हुने विश्लेषकहरूको अनुमान छ । एपी