• टाइफुन कमजोर भए पनि पूर्वी तथा मध्य चीनमा भारी वर्षा जारी ।
• साङ्घाईका दुई विमानस्थलबाट ९४३ उडान रद्द ।
• बाढी र पहिरोको जोखिम बढेपछि विभिन्न क्षेत्रमा उच्च तहको चेतावनी ।

बेइजिङ । टाइफुन ‘डल्फिन’ कमजोर हुँदै गए पनि पूर्वी चीनमा भारी वर्षाका कारण यातायात प्रभावित भएको छ । साङ्घाईका दुई प्रमुख विमानस्थलबाट हुने ९४३ उडान रद्द गरिएका छन् भने केही क्षेत्रमा सार्वजनिक यातायात सेवासमेत प्रभावित भएको छ ।

चीनको राष्ट्रिय मौसम विज्ञान केन्द्रका अनुसार आँधीले आइतबार झेजियाङ प्रान्तको तटमा दुई पटक प्रवेश गरेपछि शक्ति गुमाएको हो । केन्द्रले सोमबार बिहान आँधीसम्बन्धी सबैभन्दा न्यून तहको चेतावनी जारी गरेको छ ।

यद्यपि, पूर्वी तथा मध्य चीनका केही क्षेत्रमा सोमबार पनि भारी वर्षा जारी रहने केन्द्रले जनाएको छ । झेजियाङको पूर्वी तथा दक्षिणी क्षेत्रमा अधिकारीहरूले उच्च तहको बाढी चेतावनी जारी गरेका छन् ।

साङ्घाईमा भारी वर्षाका कारण केही स्थानीय रेलसहित सार्वजनिक यातायात सेवा प्रभावित भएको छ । झेजियाङको निङ्बो अन्तरराष्ट्रिय विमानस्थलले दिउँसोदेखि उडान सेवा पुनः सञ्चालन गर्ने जनाएको भए पनि केही उडान ढिलो वा रद्द हुन सक्ने चेतावनी दिएको छ ।

प्रान्तीय राजधानी हाङझाउमा आइतबार केही रेल सेवा रोकिए पनि सोमबार बिहानदेखि सबवे सेवा पुनः सञ्चालन गरिएको छ । उत्तरी चीनमा पनि खराब मौसमको जोखिम बढेको छ । बेइजिङका पाँच जिल्लामा सोमबार भारी वर्षाका लागि उच्च तहको चेतावनी जारी गरिएको छ ।

टाइफुन ‘डल्फिन’का कारण सप्ताहन्तमा चीनमा एक हजारभन्दा बढी उडान रद्द गरिनुका साथै दसौँ हजार मानिसलाई सुरक्षित स्थानमा सारिएको थियो ।

यसअघि दक्षिणी ग्वाङडोङ प्रान्तमा दुई साताअघि टाइफुन ‘नोल’ आएको थियो । अधिकारीहरूले उक्त आँधीलाई यस वर्ष चीनमा आएको सबैभन्दा शक्तिशाली आँधी बताएका थिए ।

गत महिना पनि दक्षिणी तथा मध्य चीनमा खराब मौसमका कारण ठूलो क्षति भएको थियो । ग्वाङ्सी क्षेत्रमा टाइफुन ‘मेसाक’का कारण आएको बाढीमा ३९ जनाको मृत्यु भएको थियो भने मध्य हुबेई प्रान्तमा आएको आँधी र हावाहुरीमा ११ जनाको मृत्यु तथा ३३१ जना घाइते भएका थिए । एएफपी