• ट्रम्पद्वारा जन्म पर्यटन नियन्त्रण गर्ने नयाँ कार्यकारी आदेश जारी ।
• जन्मसिद्ध नागरिकताको दायरा थप सीमित गर्ने प्रयास ।
• सर्वोच्च अदालतको रोकपछि संशोधित नीति अघि सारियो ।

वासिङ्टन । अमेरिकी राष्ट्रपति डोनाल्ड ट्रम्पले जन्मसिद्ध नागरिकताको दायरालाई थप सीमित गर्ने उद्देश्यले ‘जन्म पर्यटन’ लक्षित नयाँ कार्यकारी आदेशमा हस्ताक्षर गर्नुभएको छ । अमेरिकी सर्वोच्च अदालतले यसअघि जन्मसिद्ध नागरिकतासम्बन्धी आदेश कार्यान्वयनमा रोक लगाएपछि ट्रम्प प्रशासनले संशोधित नीति अघि सारेको हो ।

राष्ट्रपति ट्रम्पले जन्मसिद्ध नागरिकताको व्यवस्थाको दुरुपयोग भइरहेको दाबी गर्दै कानुनी सीमाभित्र रहेर नीति परिमार्जन गरिएको बताउनुभयो । उहाँले सर्वोच्च अदालतको पछिल्लो निर्णयप्रति असन्तुष्टि पनि व्यक्त गर्नुभयो ।

ह्वाइट हाउसका वरिष्ठ सल्लाहकार स्टिफन मिलरका अनुसार नयाँ आदेशले विदेशी आतङ्कवादी समूहसँग आबद्ध व्यक्ति, विदेशी सरकारका तर्फबाट काम गर्ने वा लबिङ गर्ने व्यक्तिका सन्तानलगायत केही समूहलाई जन्मसिद्ध नागरिकताको सुविधाबाट बाहिर राख्ने लक्ष्य राखेको छ ।

एआई निर्मित सांकेतिक चित्र । 

यसअघि ट्रम्प प्रशासनले अवैध रूपमा बसोबास गरिरहेका वा अस्थायी भिसामा रहेका अभिभावकका सन्तानलाई स्वतः अमेरिकी नागरिकता नदिने व्यवस्था गर्न खोजेको थियो । तर अमेरिकी अदालतहरूले संविधानको १४औँ संशोधनको आधारमा उक्त आदेश कार्यान्वयनमा रोक लगाएका थिए ।

ट्रम्प प्रशासनले १४औँ संशोधनको उद्देश्य गृहयुद्धपछि पूर्वदासहरूको नागरिकताको अधिकार सुनिश्चित गर्नु रहेको र त्यसको दायरा कागजातविहीन आप्रवासी वा अस्थायी आगन्तुकका सन्तानसम्म नपुग्ने तर्क गर्दै आएको छ ।

नयाँ आदेशलाई ट्रम्प प्रशासनको कडा आप्रवासन नीतिको निरन्तरताका रूपमा हेरिएको छ । यसअघि पनि प्रशासनले अवैध आप्रवासी निष्कासन, निर्वासन सुरक्षामा कटौती र आप्रवासन प्रणाली थप कडा बनाउने नीति अघि बढाएको थियो । एएफपी