मस्को । रूस-युक्रेन युद्धमा दुवै पक्षले लामो दूरीका आक्रमणलाई थप तीव्र बनाएका छन् । युक्रेनले रूसभित्रका दुई तेल प्रशोधन केन्द्रमा ड्रोन आक्रमण गरेको जनाएको छ भने रूसले युक्रेनको रेल स्टेसन र व्यावसायिक जहाजलाई निशाना बनाएको छ ।

युक्रेनी राष्ट्रपति भोलोडिमिर जेलेन्स्कीका अनुसार बाश्कोर्तोस्तान र यारोस्लाभ क्षेत्रमा रहेका तेल प्रशोधन केन्द्रमा आक्रमण गरिएको हो । उहाँले यी आक्रमणले रूसलाई शान्ति वार्तातर्फ आउन दबाब बढाउने दाबी गर्नुभयो ।

रूसको रक्षा मन्त्रालयले रातभर युक्रेनका ६०५ ड्रोन खसालिएको जनाएको छ । यारोस्लाभ क्षेत्रका गभर्नरले यसलाई युद्ध सुरु भएयताको सबैभन्दा ठूलो ड्रोन आक्रमण भनेका छन् ।

यसैबीच रूसले युक्रेनको खार्किभ क्षेत्रस्थित लोझोभा रेल स्टेसनमा गरेको आक्रमणमा दुई जनाको मृत्यु भएको छ । ओडेसा क्षेत्रमा कालो सागर हुँदै गहुँ बोकेको व्यावसायिक जहाजमा भएको रूसी आक्रमणमा पनि एक जनाको ज्यान गएको स्थानीय अधिकारीहरूले बताएका छन् ।

चार वर्षभन्दा लामो समयदेखि जारी युद्धमा कूटनीतिक प्रयास प्रभावहीन बन्दै जाँदा दुवै पक्षले ड्रोन, क्षेप्यास्त्र र मिसाइल आक्रमणलाई तीव्र बनाएका छन् । यसबाट सर्वसाधारणको हताहत हुने क्रम पनि बढ्दै गएको छ । एएफपी