• भूकम्पमा २८ जनाको मृत्यु पुष्टि ।
• सपिङ मलको भग्नावशेषमा उद्धार अभियान जारी ।
• हजारौँ परिवार अझै बिजुली र खानेपानीबाट वञ्चित ।

कुमामोटो (जापान) । जापानको दक्षिणपश्चिमी क्षेत्रमा गएको शक्तिशाली भूकम्पमा मृत्यु हुनेको संख्या २८ पुगेको छ । उद्धारकर्मीहरूले ग्यास विस्फोटपछि भत्किएको एओन सपिङ मलको भग्नावशेषमा फसेकाको खोजी तथा उद्धार कार्यलाई निरन्तरता दिएका छन् ।

सरकारी अधिकारीहरूका अनुसार गत मङ्गलबार भूकम्पपछि ग्यास विस्फोट भएको एओन सपिङ मलबाट थप चार जनाको शव निकालिएपछि मृतकको संख्या २८ पुगेको हो । हालसम्म उक्त मलबाट १० जनाको उद्धार गरिएको छ । उद्धार गरिएकामध्ये चार जनाको मृत्यु भएको छ भने पाँच जना घाइते भएका छन् । मलभित्र अझै केही कर्मचारी फसेको आशंका गरिएको एएफपीले जनाएको छ ।

यात्सुशिरो सहरस्थित निप्पोन पेपर कारखानामा पनि पाँच जनाको मृत्यु भएको पुष्टि भएको छ भने अन्य चार जना अझै बेपत्ता छन् ।

एआई निर्मित चित्र ।
अमेरिकी भूगर्भ सर्वेक्षण (यूएसजीएस) का अनुसार भूकम्पको तीव्रता ६.८ मापन गरिएको छ । यसअघि जापानी अधिकारीहरूले यसको परिमाण ७.१ म्याग्निच्युड रहेको बताएका थिए ।

भूकम्पका कारण आवासीय घर तथा पुलमा क्षति पुगेको छ भने दशौँ हजार सर्वसाधारण अझै बिजुली र खानेपानी सेवाबाट वञ्चित छन् । मुख्य भूकम्पपछि सपिङ मल खाली गरिए पनि करिब ५० मिनेटपछि भएको ठूलो ग्यास विस्फोटका कारण त्यहाँ रहेका केही कर्मचारी फसेको अनुमान गरिएको छ ।

प्रशान्त महासागरको ‘रिङ अफ फायर’ क्षेत्रमा अवस्थित जापान विश्वकै सबैभन्दा बढी भूकम्पीय जोखिम भएका मुलुकमध्ये एक हो । कुमामोटोमा सन् २०१६ मा आएका दुई शक्तिशाली भूकम्पमा २७३ जनाको मृत्यु भएको थियो भने एक हजार ८०० भन्दा बढी घाइते भएका थिए । त्यसअघि सन् २०११ को ९.० म्याग्निच्युडको विनाशकारी भूकम्प र सुनामीमा करिब १८ हजार ५०० जनाले ज्यान गुमाएका थिए । एएफपी