• टाइफुन ‘नाउल’ले दक्षिणी चीनमा व्यापक असर ।
• सात लाखभन्दा बढी सुरक्षित स्थानमा सारिए ।
• ३५० उडान र सयौँ रेल सेवा रद्द ।

हङकङ । शक्तिशाली टाइफुन ‘नाउल’ आइतबार दक्षिणी चीनको ग्वाङडोङ प्रान्तमा ठोक्किएपछि व्यापक जनजीवन प्रभावित भएको छ । तीव्र हावाहुरी र भारी वर्षाका कारण सात लाख १५ हजारभन्दा बढी मानिसलाई सुरक्षित स्थानमा सारिएको छ भने करिब ३५० उडान र सयौँ रेल सेवा रद्द गरिएका छन् ।

चीनको राष्ट्रिय मौसम केन्द्रका अनुसार टाइफुन स्थानीय समयअनुसार बिहान ३:५० बजे ग्वाङडोङ प्रान्तको हुइझोउ सहरअन्तर्गत हुइडोङ काउन्टीको तटीय क्षेत्रमा ठोक्किएको हो । सरकारी समाचार संस्था सिन्ह्वाले यसलाई यस वर्ष चीनमा चीनको भूभागमा ठोक्किएको सबैभन्दा शक्तिशाली टाइफुन भएको जनाएको छ । आँधीको केन्द्रनजिक प्रतिघण्टा ११० किलोमिटरको वेगमा हावा चलेको थियो ।

टाइफुन भित्री भूभागतर्फ अघि बढ्दै जाँदा कमजोर बन्दै गए पनि ग्वाङडोङ र आसपासका क्षेत्रमा भारी वर्षा र तीव्र हावाहुरी जारी रहेको छ । तटीय क्षेत्रमा धेरै रूख ढलेका छन् भने हङकङमा कम्तीमा नौ जना घाइते भएका छन् । स्थानीय प्रशासनले दक्षिणी ग्वाङडोङ र दक्षिणपूर्वी फुजियानका केही क्षेत्रमा अझै उच्च सतर्कता अपनाउन आग्रह गरेको छ ।

यसअघि यही महिनाको सुरुमा टाइफुन ‘भाभी’ले पूर्वी चीनमा ठूलो क्षति पुर्‍याउँदा २० लाखभन्दा बढी मानिसलाई सुरक्षित स्थानमा सारिएको थियो । त्यसअघि टाइफुन ‘मेसाक’ पनि दक्षिणी चीनमा ठोक्किएको थियो । एपी