- अमेरिका र साउदी अरबबीच गैर-सैनिक आणविक कार्यक्रमसम्बन्धी ऐतिहासिक सम्झौता घोषणा ।
- ट्रम्पको सर्त-साउदीले इजरायलसँग सम्बन्ध सामान्यीकरण गरेपछि मात्र सम्झौता कार्यान्वयन ।
- सम्झौताले आर्थिक अवसर सिर्जना गर्ने अपेक्षा भए पनि मध्यपूर्वमा आणविक होड बढ्ने चिन्ता व्यक्त ।
रियाद । संयुक्त राज्य अमेरिका र साउदी अरबले साउदी अरबमा गैर-सैनिक आणविक कार्यक्रम विकास गर्ने ऐतिहासिक सम्झौता घोषणा गरेका छन् । अमेरिकी राष्ट्रपति डोनाल्ड ट्रम्पले भने यो सम्झौता साउदी अरबले इजरायलसँग सम्बन्ध सामान्यीकरण गरेपछि मात्र कार्यान्वयनमा आउने स्पष्ट पार्नुभएको छ ।
यो घोषणा अमेरिका-इरान तनाव र इरानको आणविक कार्यक्रमलाई लिएर जारी विवादका बीच आएको हो । सम्झौताले अमेरिकी कम्पनीहरूलाई अर्बौं डलरको व्यापारिक अवसर सिर्जना गर्ने अपेक्षा गरिएको छ भने साउदी अरबका लागि पनि रणनीतिक उपलब्धिका रूपमा हेरिएको छ ।
यद्यपि सम्झौताले मध्यपूर्वमा आणविक प्रतिस्पर्धा बढाउने जोखिम रहेको भन्दै आलोचना पनि सुरु भएको छ । अमेरिकी सञ्चारमाध्यम वाल स्ट्रिट जर्नल ले सम्झौतामा अमेरिकी कम्पनीलाई साउदी अरबमा युरेनियम संवर्धन गर्न दिने प्रावधान हुन सक्ने जनाएको भए पनि ट्रम्पले त्यसलाई अस्वीकार गर्दै कुनै पनि प्रकारको युरेनियम संवर्धन नहुने दाबी गर्नुभएको छ ।
सम्झौता अब अमेरिकी कांग्रेसमा अनुमोदनका लागि पेश हुनेछ । रिपब्लिकनको बहुमत रहेको सदनबाट यसलाई रोक्ने सम्भावना कम देखिए पनि दुवै दलका केही सांसद र इजरायली अधिकारीहरूले साउदी अरबले भविष्यमा आणविक हतियार विकास गर्न सक्ने आशंका व्यक्त गर्दै विरोध जनाएका छन् ।
अमेरिकी विदेशमन्त्री मार्को रुबियोले कुनै पनि गैर-सैनिक आणविक सम्झौतामा कडा सुरक्षा र अप्रसारका मापदण्ड लागू हुने बताउनुभएको छ । उता, साउदी अरबले भने आफ्नो आणविक कार्यक्रम पूर्ण रूपमा शान्तिपूर्ण उद्देश्यका लागि भएको दाबी गर्दै आएको छ । एएफपी
