काठमाडौं, असार १२ । सत्तारूढ नेपाल कम्युनिष्ट पार्टी नेकपाको स्थायी कमिटी बैठक सुरु भएको छ । केहीबेर अघि प्रधानमन्त्री निवास बालुवाटारमा बैठक सुरु भएको हो । बुधबार सुरु भएको बैठकमा अध्यक्षद्वय केपी शर्मा ओली र पुष्पकमल दाहालले आ–आफ्नो धारण राख्नुभएको थियो ।
आजको बैठकका लागि विभिन्न ७ वटा एजेण्डा तय भएको नेकपा प्रवक्ता नारायणकाजी श्रेष्ठले बताउनुभएको छ । बैठकमा सरकारको कामको समीक्षा, पार्टी एकता प्रक्रिया, अमेरिकी सहायता परियोजना एमसिसी र अन्य विषयमा विविध विषयमा छलफल हुने बताइएको छ ।
नेकपाभित्र पछिल्लो समय अमेरिकी सहयोग परियोजना एमसीसीको विषयले विवाद चुलिएको छ । प्रधानमन्त्री एवं पार्टी अध्यक्ष केपी शर्मा ओली संसदको चालू अधिवेशनबाटै एमसीसी पास गर्नुपर्ने अडानमा हुनुहुन्छ ।
तर दाहालसहित वरिष्ठ नेता माधवकुमार नेपाल, झलनाथ खनाल, भिम रावल लगायतका नेताहरुले यसको चर्को विरोध गरिरहनुभएको छ । पार्टीभित्र संघर्ष चलिरहँदा संसदको बैठक १७ गतेसम्मका लागि रोकिएको छ ।
